Shillong: Ka kynhun jong kiba duna dkhot met bapher bapher, ba la tip kum ka Federation of person with Disabilities ki la mih shakhmat ban pynrem jur ia ka jingkren jong u bah S Osborne Kharjana, u kyrtong jong ka seng India National Congress na sohiong constituency ha ka elekshon ban wan, halor ka jingkren pyrshah ki jong u ia kito ki briew kiba don ha kum kitei ki jing duna, ha kawei na ki jingialang ki ba dang shu dep shen, da kaba u ong “Hato ngi juh jied mo ia kiba dkoh, ba matlah, ba kyllut ban long ki nongialam”.
Haba iakren bad ki nongthoh khubor, U President jong ka kynhun, U bah Starwin Kharjana, u la ong ba ka jingkren jong utei u kyrtong jong ka seng congress na sohiong hi ka dei kaba la pynkhein ia ka aiñ ba la tip kum (RPD act 2016) bad u ong ruh, ba kiba bun na ki briew kiba duna dkhot met ha ka jylla Meghalaya ki bat ha ki kam synshar ha ki shnong ki thaw bad kiwei pat ki kam ba ki la bat.
Katba ka kong Bertina Lyngdoh, ka la ong ba kam sngew lah ban pdiang ia ka jingkynthoh jong u tei u rangbah, ba un shu kynthoh khlem da pyrkhat shwa lada ka ktah ne em ia kiwei pat, hynrei imat u tei u rangbah ruh u don ki jingduna ha ka bor pyrkhat, namar ki jingkren jong u ki long pyrshah ia ka hok kaba la pynkup bor ha ki, da ka sorkar.Ka kynhun ka la dawa ruh ba u tei u rangbah u dei ban pan map hapoh 24 kynta lyngba ki lad pathai khubor bad ki la kyntu ruh ia u tei u nongialam ba un pynshong nongrim bha ia ki rukom kren, khnang ba kin ym ktah ia kiwei pat ki briew.
Ka kynhun ka dawa ruh ba ka Meghalaya Pradesh Congress Committee ba ka dei ban pynshitom ia une u briew, ha ka jaka ba kin long ki nongialam ki ibeiñ bad kren beiñ pynban ia kito kiba duna, ha ka jaka ba kin ai jingiarap.
Phi don ban ong eiei?