Tynrah dadien U Himanta ia U Conrad?

U Conrad Sangma, nongialam ka seng NPP, u ju leh juh leh jan bha, ia U Himanta Sarma, nong ialam ka seng BJP na Assam bad u ju pynlut por ban leit shongkai, ban leit ia bam ja miet khah khah bad utei u heh jong katei ka seng, sha ka thain shatei lam mihngi bad ka la don kawei ka interview, ha kaba u nongthoh khubor, ula kylli ia U Conrad “Balei ba u ju pyndem toin ialade ha khmat U Himanta Sarma” bad ula ong hi u nong kylli jong ka news channel India Today “Ka daw kam dei ba ki dei ma ki, kiba thaw ia ka sorkar NPP, ha ka jylla Meghalaya?”.

Haba shu peit ha kine ki sngi, la iohi pynban, kumba U Himanta Sarma, ula dung da dien ia U Conrad Sangma bad kata ka long, ba u thmu ban knieh lut noh, ia baroh ki MLA jong ka seng NPP bad ban thep noh sha ka seng BJP bad katei ka paw shai, ba ki don ar ngut kiba la dep rung sha katei ka seng bad sa 7ngut kiba dang shu iakynduh ia U Himanta ha Guwahati, ha ki khyndiat sngi ba ladep bad lada ki dak ki shin, ki kdew shai, ha katei ka dur; kaba ima, ka long ba ioh ka BJP, ka rong lut ia ki MLA jong ka seng NPP bad kin sa shu ia sah hi tang shi para, ha la ka jong ka seng.

Ka NPP, kam pat dei hi ruh ka seng kaba khlain, namar ba wat ha ka por jong U PA Sangma, kam shym la lah ban leh eiei ruh em ia ka Garo hills, namar ba ha u snem 2013, katei ka seng, ka don tang 2ngut ki MLA, ha kaba wat U Conrad, u shah pynliem ialade na Selsella.
Mynta U PA Sangma, um don shuh bad kito ki jingleit pyrta bad niew tang jong U Conrad, ia la u jong u kpa, kin nym pynmih vote eiei ruh em ha ka elekshon MLA 2023; khamtam, haba un ialeh pyrshah ia ar tylli ki seng ba satar jong ka India, ka BJP bad ka TMC.

Haba shu iohi, ha kine ki sngi, ka paw shai, ba U Conrad Sangma, u don ha ka jing khuslai mynsiem kaba jubor shi katdei bad marwei marwei, u leit sam khunsniang, u leit sam ia ka skhim T.5,000 bad nangta u leit plie ia ki Block, ki Civil Sub Division bad ki District bad katei ka dei ka jingleh kutlad jongu, ha shwa ka elekshon bad kaba kham ijli than, ka long, ba ia baroh jait ki skhim, u theh lut sha Garo hills, katba tang shi dana na kitei u wan rah sha Khasi, Jaintia.
Katba ka jia, hynrei, lada 10ngut ki MLA ka NPP, kin poi sha ka BJP, kumta katei ka lieng, ka la thikna ban ngam ha u 2023.