Pynrem jur u MR, ïa ka jingkren u CEM ka KAAC, ia kiba sah ha Mukroh

Shillong:U Myntri Rang bah ka Jylla Conrad K Sangma, mynhynnin ka sngi thoh dieng, ula pynrem jur ïa ka jing kren jong u Chief Executive Member (CEM) ka Karbi Ang long Autonomous Council (KAAC) Tuliram Tongkhang, uba kam ba ki Khasi-Pnar basah ha shnong Mukroh, West Jaiñtia Hills ki dei kiba shu wan shong be-aiñ.

U Myntri Rangbah ula ong ba ka jingjia ha Mukroh ka dei kaba tynjuh bha bad kum kine ki jingkren ki dei ki bym ïahab satia.
“Kum kine ki jingkren kim dei satia ban mih, ngim sngew tynnad ïa kine ki jingkren, kine ki dei ki por ba ngi mad ïa ki jingeh bad kum kine ki jingkren kin nym ïarap ban tem ïa ka jinglong jingman,” ula ong.

U Myntri Rangbah ula pyntip ruh ba ula dep ban kren bad u Myntri Rangbah ka Assam Himanta Biswa Sarma bad ka jingkren ha ka kyrdan jong ki Myntri Rangbah ka dei ka nongrim jong baroh artylli ki Sorkar Jylla.

“U (Biswa) la pyntip ïa nga ba kum kine ki jingkren kim dei satia ha ka ban mih hynrei kaei kaba kongsan ka long ba kin don beit ki riew shimet bad ki briew na ki kyrdan bapher bapher ki ban ïai kren, haba kut hi, ka shong ha ki nongïalam ha ka kyrdan ki Myntri Rangbah, kine ki jingkren (Myntri Rangbah) ki dei ïa kaba hap khmih kum ka nongrim jong kano kano ka Sorkar,” ula ban jur.