Shillong:Mynhynnin ka sngi u President seng samla jong ka party HSPDP u Bah Sandonbor Ryn tathiang u la ïathuh ba kin pynlong ïa ka jing ïamir jingmut halor ka phang Khasi Jaiñtia State ka ban long ha ka 5 tarik u Nohprah 2022.
Haba kren ha ki lad pathai khubor, hadien ka jingïalang, u la ïathuh ba ki kong san ki ban wan ai jing kren ha katei ka sngi kin don kum ki riew shemphang ki long u Dr. LS Gassah, ba la shongthait na ka kam hikai na ka skul bah NEHU, bad u Muktiar u Bah Robert June Kharjahrin.
La ïathuh ba ka party ka la dep ban pynshna ïa ka ïing ha Mawblei bad kaba sah mynta ka long ban plie noh bad ban aiti noh sha kato ka longïing bad kane ka jingaiti kan long ha ka 20 Nohprah 2022 kane kan long kum ka jingai sngewbha Khristmas.
Ha kane ka sngi, ki la ïakren ruh ïa ka jingpynrung dkhot ïa ki paidbah sha ka seng HSPDP bad ki samla kiba la rung sha ka party mynta ka la long 5200 tam eiei bad kaba kham sngewtynnad ka long ba ki samla kum na Laitumkhrah bad Polo ruh ki la phai sha ka party.
Kine ki samla kiba la rung sha ka HSPDP kim dei tang ki samla hynrei ki dei kiba don ha ki kyrdan ki bapher bapher kiba don mynta ha ka party, ka seng ka la pynlong ruh ïa ka jingïakob thoh essay ha kaba ïadei bad ka Khasi Jaiñtia State ha kaba bun ki samla ki la ïa shim bynta bad kaba sah mynta ka long sa tang ban pynbna ïa ki nongjop.
Ki party tit bym don nongrim ba khohreh tang da la jan election, donbok phin khylliap lama ha u 2023