U Bah Sanbor u la iakren bad ki nongialam BJP ha Delhi

Shillong, 31 Nailar:
U MLA ka South Shillong u Bah Sanbor Shullai u la don ka jingiakren bad ki heh nongialam ka BJP ha Delhi dang shen halor ka jinglong jingman ka sain pyrthei ha kane ka jylla.
Katkum ka jing iakren bad u president ka BJP Meghalaya u Bah Khlursing Lyngdoh u la iathuh ba u Bah Sanbor u la pynpaw ia ka jing sngew tynnad ia ka jinglong ki nongialam ka BJP.
“U Bah Shullai u la iakynduh ia ki nongialam ka BJP ha Delhi bad u la pynpaw ia ka jingsngew tynnad ia ka jinglong ki nongialam ka BJP”, la ong u Bah Lyngdoh ha kane ka sngi Nyngkong.
U Bah Lyngdoh um pat kwah bha ban iathuh ia ka jingmih na ka jingiakren u Bah Sanbor bad ki nongialam ka BJP ha Delhi hynrei u kyrmen ba ka jingiakren ka long kaba sngew tynnad bad kaba biang.
Ha kawei ka liang, la iathuh ba tang u Bah Sanbor uba la sma jingiwbih ka BJP hynrei ki don ruh ki MLA bad ki riew pawkhmat kiba la peit kliaw ia ka por kaba biang ban leit pynsnoh bad ka BJP.
U Bah Sanbor u kyrshan ia ka MUA-II ba ialam ka Congress ha kane ka jylla. Mynshwa, u la bat ia ka shuki  Deputy Speaker hynrei u la hap ban iehnoh shwa ban don ka jingiatynjuh bor ban pynkhyllem ia u Speaker ha ka dorbar mang tyngka kaba dang shu dep.
Ka thymmei khubor ka la ong ba u Bah Sanbor u la shah pynbor ha u Myntri Rangbah u Dr Mukul Sangma ban iehnoh ia kane ka shuki. Hynrei na ka liang u Bah Sanbor u la ong ba u la iehnoh ia ka shuki da ka mon lajong.
Ha kawei ka liang, u president ka BJP u la iathuh ba ka party mynta ka dang pynkhreh ban pynrung dkhot shaid shaid bad shen kan sa khang noh ia ka jingkhang pynrung dkhot bad hadien kan sa plie biang ha ka kylla baar.
“Ngi la don kiba pynrung dkot da ka online haduh  24 hajar ngut bad ki phom ba shu sam ki long 40 hajar ngut bad lada baroh kan long 64 hajar ngut”,  la ong u Bah Lyngdoh bad u la bynrap ba ia ka phom ba sam ym pat pynphai lut bad namarkata, ym pat tip bha katno baroh kiba la rung dkhot.