Da ka bill thymmai, pynkhreh ka sorkar ban bujli ha jaka ka Ordinance

Shillong, 31 Nailar:
Hadien ba la mih ka jingpyrshah na ki paidbah ia ka Ordinance, ka sorkar ka la rai ban pynkhreh noh da ka Bill thymmai halor kumno ban pynkup bor ia ki bor synshar shnong. Ia kane ka Bill thymmai yn iakren bad ki seng sain pyrthei kaban long ha ka sngi Hatmajai ban wan.
Ia kane ka rai la shim ha ka jingialang jong ka kynhun myntri kaba long mynta ka sngi Nyngkong. U Myntri Rangbah ka jylla u Dr Mukul Sangma u la ong ba ka sorkar ka la bthah ia ki tnad ba dei halor ki ain ban pynkhreh da ka Bill thymmai ban pynkup bor ia ki bor synshar shnong ha jaka ka ordinance. Ia kane ka Bill yn sa iakren ha ka jingialang jong ki seng sain pyrthei ban khot ka sorkar ban long ha ka sngi Hatmajai ban wan.
U Dr Mukul Sangma u la ong, “Ngin sa shim ia ka rai ban iaid shakhmat ban pynlong ain ban bujli noh ha jaka ka Ordinance”.
Ha kane ka jing ialang yn iakren ruh ia ka Ordinance bad ia kiwei ki Bill ba la mynjur jong ki Autonomous District Councils (ADCs) hynrei kiba dang sah kut ha miej u Lat ka jylla.
Ia ka Ordinance ne ka Meghalaya Local Administration (Empowerment of Traditional Institutions, Traditional Bodies, Headmen in Governance and Public Delivery System) Ordinance, 2015  la soi da u Lat ka jylla ha ka 29 tarik Jymmang hadien ba ka sorkar ka la thmu ban pynkup bor ia ki rangbah shnong hynrei la mih ka jingpyrshah ia kane ka ordinance.
U Dr Sangma u la ong ba ka jingialang kan sa iakren la ka sorkar kan thaw da ka ain thymmai ia ki bor synshar shnong ne lane kan ieh shwa kumto haduh ba ka ordinance kan iap hi hadien ba la kut 6 bnai.