Shah nion kput, ki nong Mukroh ha ki pulit Assam

Ka dei ka jingjia, kaba sangsot na kiba sangsot tam, halor ka jingshah pyniap kput ki riew madan, ha Mukroh; ki bym don tiar ialeh eiei ruh em, ha ki pulit thrang snam jong ka Assam.

Na kaba ia sngewthuh paidbah; ka jingjia, ka dei na ka jingshah kem, kawei ka trok kit dieng bad ka jingshah kem sa ki nongrep kiba don ha ki lyngkha jongki, ha kaba ki paidbah, ki la khie bitar lep bad leit tur sha ka thanat pulit ha katei ka jaka bad tang na katei ka daw, ki pulit kiba don ia ki tiar siat kiba khlain bor, ki shu siat kput ia ki riew paidbah, kumba siat ia ki mrad.

Ngim tip ia kaei ka daw, kaba don sha lyndet, hynrei, katei ka paw shai, ia ka jingleh dusmon jong ki pulit Assam, ia u doh u snam jong ka jaitbynriew Khasi, Jaintia lane lah ban ong, ba U Himanta Sarma, um shym la niew burom eiei ruh em ia U Conrad Sangma, myntri rangbah ka jylla.
Ha kaba kum kane ka por ia pynbeit pud, ngi ngeit skhem, ba ka la don lypa, ka jing pyn sngew thuh ia ki briew sorkar, ha baroh arliang, ba kin long kiba pyrman bha, ha ki liang baroh; hynrei ka jingjia ha Mukroh, kaba dang dei ban iaid ka jing pynbeit pud, ka pyni ba ka Assam, ka niewbein bad ka khein tad dor ia u doh u snam jong ka Ri Khasi Jaintia.

Na kaei kaba peit ia ka jing pynbeit pud ha ka sien nyngkong, la iohi ba U Conrad Sangma, ula leh jubor justi ban pynhun ia U Himanta bad ula bret lut sharud ia ki jing ujor, ki trai jaka sha ki khappud jong ka Hima Jirang, Hima Mylliem bad kiwei bad nangtei, la shu duh ei ia 19KM ka jaka sha ka Assam.
Ban da dei u nongialam, uba stad, ula dei ban iohi jngai ia ki jingkhih phaloh jong katei ka kam bad um dei satia ban leh ialade kum uba shah pynbor, ha kiwei pat; hynrei ka jingleh hak dak bad ka jing bym khein snep, ia ki trai jaka, ka siew pynban, da kane ka dor kaba rem shi katdei.
Synei ia U Conrad Sangma, ba ka kti jongu, ka la khah da ka snam, jong ki riew lui lui, ha shwa ba un leit sha ka elekshon 2023, kumba ka la jia ia U Mukul Sangma, ha ka jingiap ki 4ngut ki Khasi ha Langpih ha u snem 2010 bad nangta sa ki 2ngut ki riew paidbah ha Mookhep ha u 2014.