Halor ka jingiap ha Mukroh, dawa ka UDP, ban tohkit da ka NIA

Shillong:Ka Central Executive Committee (CEC) jong ka seng United Democratic Party(UDP), mynhynnin ka sngi, kam shem la lah satia ban pynbna ia ki kyrtong jong ka thup kaba nyngkong jong ka parti ki ban iakhun ia ka elekshon sha ka ïingdorbar thawaiñ jong ka jylla ha u snem 2023.

Haba ai jingkren ha kane ka sngi U President jong ka parti, u bah Metbah Lyngdoh u la ong “Kum ka dak ka jing sngewlem ia ki mynsiem ba la duh noh ha ka jingjia ha Mukroh kaba hap ha Laskeiñ blok, ha Raliang konstitwensi ba la mihkhmat da u MLA jong ka parti UDP, bah Nujorki Sungoh, ka seng ka pynsangeh noh ia ka jing pynbna ia ka tiket, hynrei kan sa pynbeit pat ha ki ki taiew ban wan.

Ha ba iadei bad kane ka jingjia ha Mukroh, u President jong ka parti u la iathuh ba u pynrem jur ia kane ka jingjia bad ka jing thombor ki pulit Assam bad ki dawa ruh ba ka sorkar kan shim ia ka rai ba tyngeh ba ym dei tang ban thung da ki jingtohkit ba malu mala, hynrei kin phah beit da ka jingtohkit ba laitluid jong ka sorkar pdeng ka National Investigation Agency (NIA).

Haba iadei bad kane ka jingjia, ka parti ka la pynlong ruh ia ka jing sngap jar ba ar minit, ban sngewlem ia ki mynsiem ba lui-lui kiba la duh noh ia ka jingim bad sha kiba haing ha sem jong kito ki lanot ruh kumjuh.
U President jong ka parti, u la iathuh ba na ka liang jong ka parti United Democratic Party (UDP) kan phah ruh ia ki katto ki nong ialam jong ka parti ban leit jngoh ia ki nong shong shnong jong ka Mukroh.