Na ka roster system, ka nang shimpor shuh shuh, ha ka thungkam, ong ka FKJGP

Shillong: Ka seng Federation of Khasi Jaintia and Garo people (FKJGP), ha ka lah sngi u Blei, ka 21 tarik jong u Naiwieng, ki la leit ban ia kynduh kyrpang ia u Bah PR Marwein, Chairman jong ka tnat thungkam thung jam jong ka jylla ka Meghalaya Public Service Commission (MPSC), ha ophis treikam jong u ha Lower Lachumiere, Shillong.

Ki katto katne ngut ki dkhot jong ka Seng, ha ka jingialam jong U President, Bah Dundee C Khongsit, haba ia kren bad ki nongthoh khubor, hadien ba ki la mih na ka kamra treikam jong u Chairman ka MPSC, ki la iathuh, ba ka jing ia kynduh jong ki, ka long beit ban wad jingtip halor ka jingsuki bha ka thung kam thung jam ha ki tnat ba pher ba pher jong ka sorkar, wat la ka kyrduh kam kyrduh jam ha ka jylla ka jur bha, kumba long mynta.

Hynrei, ka long pat kaei kaei kaba sngewtynnad ban tip ba naka liang jong ka MPSC, ka la sdang ban pynkhreh ia kiei kiei kiba don kam, wat la ka kommision ka bun bha ki kam bad ki jing slem ha ka thungkam thung jam ha kito ki kam ba thylli ha ki tnat ba pher ba pher, khamtam lei ba la wan sa ka roster system ka nang shim por shuh shuh ban pyntyllun haba ia dei bad kane ka bynta. Ki don ruh sa kiwei pat ki bynta ba ki tnat sorkar kiba lait thylli ki kam, ki slem ban phah sha ka MPSC ba katno tylli ki lait bad kiwei kiwei ki jing donkam.

Ka MPSC ka donkam ruh ban wanrah ia ka rukom treikam ba thymmai, kat kum ki juk shai ba mynta.

Une u nongialam jong ka FKJGP, u la iathuh, ba na ka liang jong ka seng ka la kyrpad ruh ba ka MPSC, kan pynkylla noh ia ki rukom treikam ha ka thungkam thung jam, kum ha ki eksamin ka dei kaba donkam bha, khamtam lei ha ki personal interview ba kin buh ia ka video, khnang ba kito kiba leh interview ki dei ban ioh ban peit ia kato ka video record ban iohi shai bad ban pyntikna ba ka thung kam thung jam kan long kaba khuid ba suba.

Haba iadei bad ka polisi thungkam thung jam ha ka jylla, na ka liang u bah Khongsit, u la ong ba ka kamram ban leh da ka sorkar, la leh da ki sengbhalang, namar ba ka sorkar, kumba long haduh mynta ka khlem lah ban shimkhia ban bate ia ki samla jong ka jylla, khamtam ha ki kompeni bunsien bad ki dei ki Seng bhalang hi kiba hap ban leit ia kren bad ki kompani ba kin buh lem katta persen ban ai kam ia ki trai jylla.