Ki nong vote bar jylla, kim jied seng trai ri?

Halor ka jingkren jong U bah BM Lanong, u nongialam ba rangbah jong ka seng UDP, ba ki bar jylla, kim ju kyrshan seng trai ri, ka la dei kumta, ka mat ia ki trai shnong lane ki Scheduled Tribe, ba kin tih jylliew, la ka don jingshisha ne em.

Mar ia kren ia katei ka mat, kawei ka jing shisha, ka long ba U bah Bindo, um pat ju jop elekshon ryntih na ka Laitumkhrah Consti tuency lane ka East Shillong bad ha ka rta jongu, kaba la rangbah bha, hynrei U Bah Bindo, ula jop dang arsien ia ka elekshon MLA, katba ia ka MDC te u jop kynthih, haduh u snem 2014 bad katei ka don ka jingshisha, halor ka jingkren U bah Bindo, ba ki dkhar kim vote ia u, ha ka elekshon MLA, katba ki Khasi, te ki vote ryntih beit, ha ka elekshon MDC.

Hynrei hangta pat ruh, ka don ka mat ban iatai bad kata ka long ba U Bah Bindo, ruh um shym la shah rem kynthih bad ki don khyndiat sien, ki khep ba u jop bad don bun kiba um jop, katba ka kong Ampareen Lyngdoh, ka la ialeh teng ia ka elekshon MLA na ka seng UDP, ha u snem 2008 bad ka jop.

Lada iakren kham jngai ia katei ka mat, ka don hi ka jing shisha, ba U bah AL Hek, u ju jop na Pynthorumkhrah, na ka seng Congress, BJP bad U bah Sanbor Shullai, u ju jop kynthih na Laban, na ka seng NCP (kham mynshwa) bad nangta sa ka seng BJP, katba U bah Paul Lyngdoh, u jop bad shah rem noh, na ka seng UDP na West Shillong, katba U Bah Mohendro Rapsang, u pynliem ia U Bah Paul na ka seng Congress.

Kitei ki dei ki jingshisha, hynrei ha kajuh ka por, ka wan pat ka mat, ba lada ki dkhar, kim ju jied seng trai ri, kumta balei pat ki Khasi, ki jied ia ki seng dkhar bad hangtei kin don ki ban ong, ba ki khasi ki bieit pisa; hynrei katei ruh kam dei ka nongrim kaba skhem, namar ba lada ki Khasi ki ioh pisa, kumta ki dkhar ruh, ki ioh beit, tangba ka lah ban long, ba lada ki ioh pisa makna, hynrei kin vote beit sha ka seng, kiba ki sngew shaniah halade.
Kam dei tang kata, hynrei ki dkhar, ki iohi, ba ki seng trai ri, kin kham ia shah ia ki jaitbynriew trai shnong bad kumta, kim kwah ban ailad ia ki, katba ki trai shnong pat kim sngewthuh, ba ki seng India, kin kham ailad ia ki dkhar ruh, ha ka jinglong jingman bad ka kamai kajih jongki.