Ka 5hajar, ka dei ka skhim, kam shym dei satia ka ram, ong u myntri

Shillong: U Myntri ka tnad ba khmih ïa ka rep ka riang hapoh ka jylla u Bah Banteidor Lyngdoh, ha ka 17 tarik Naiwieng, haba kren sha ki nongthoh khubor, halor ka skhim FOCUS, ula pynpaw ba kane ka dei ka skhim, kam dei ka ram kaba la shim na Bank.

U Bah Banteidor ula ther kylla ba kaei kaba u President ka BJP Meghalaya u Bah Ernest u kren tang ban pynsngewthuh bakla ïa ki paitbah kiba pyndonkam ïa kane ka skhim FOCUS, tang ban iohnong seng saiñ hima ïa la ka jong ka party ban pynthoh bria ïa ka sorkar.

Na ka liang jong u, um kwah ban ong eiei, hynrei ula pynpaw ba ka skhim FOCUS ka thmu ban kyrshah ïa ki nongrep hapoh ka jylla namar ïa kane ka skhim la dep ruh ban pyllait paidbah ryngkat ka jingsakhi jong u Myntri Rangbah ka jylla u Conrad Sangma, kaba la mang ban ai ïa kane ka song pisa T 5000 sha ki kynhun ba pynmih mar, ne ki (producer Group) kiba la bsuh khlieh ha man la ki District baroh ka jylla bad ha ki shnong ki shong, ba kin ïoh jingïarap kum ka grant sha ki nongrep kiba kynthup naduh ki ba ri jingri ne kiba rep ïa ki soh ki pai ,ki jhur ki jhep bad ki wei kiwei ki ban kyntiew ïa ka ioh ka kot jong ki kynhun kiba la thaw ïa ka kane ka ban ioh na kane ka skhim FOCUS.

“Ban ïa leh politic ïa ka kam shakri paitbah kam bha haba ka sorkar ka leh ïa kaba bha, ioh lehse kane ka jingkren u Bah Mawrie kadei namar artat mynta la beh bha ka samoi election ban wan, ioh ka dei ka jingkren shongshit jong u, tang ban iong nong seng saiñ hima ïa la ka jong ka party” la ong u Bah Banteidor.

Shuh shuh ula bynrap da kaba ong kaei kaba u Bah Mawrie, u kren, ka dei kaba ula ka ialam bakla ioh ka don ka jingtyrwa pisa ban ai loan, hynrei ka FOCUS hi ka dei ka skhim ban ai sha ki paidbah la ka dei T.5000 ne katba sngewbit ban aï.

U Bah Banteidor ula pynshai ruh ba kane skhim ka dei shi bynta ban ïarap ia ki nongrep bad lada ki paidbah ki shem jingeh ula kyntu ba kim dei ban tare khlem nongrim ioh wanrah ka jingduhnong hadien ba ladep election, hynrei ki paitbah ki dei ban leit sha Block ki don ki nongiarap ki ban pynsngewthuh bad kin pynshai haba ia dei bad kane ka skhim.