Ka kput pynjot briew, ha ka sain hima sima

Ka jing ia pyni bor hapdeng jong U Conrad Sangma bad U Bernard Marak, ka la kdew shai, ha kine ki sngi, ba ka kput pynjot briew, ka la trei kam bha ha ka sain hima sima jong ka jylla Meghalaya.

Balei, ba la dei ruh ban ong, ba ka dei ka kput pynjot briew, namar ba U Conrad Sangma, u dei u myntri rangbah jong ka Jylla bad u dei u nongmihkhmat jong ka South Tura Constituency, katba U Bernard Marak, u dei U MDC jong katei hi ka Constitency bad balei, ba la hap ong hi kumta, namar ba ka High Court jong ka Meghalaya, kam lap daw eiei ia ki jingkynnoh jong ki pulit ka Tura, pyrshah ia U Bernard bad kumta, ka la pyllait jamih noh ia u, hadien, ba ula shah set phatok khlem daw, la kumba 3bnai tam eiei.

Haba ka kput pynjot briew, ka la sdang, kumta khlem pep, kan kyrtoh kylla sha lade bad katei ka la paw shai, na kaei kaba U Himanta Sarma, myntri rangbah ka Assam bad uba dei u heh jong ka BJP sha ka thain shatei lam mihngi, un leit iuhkjat nyngkong eh ha Tura ban kanbas, na ka bynta U Bernard Marak, u ban iakhun pyrshah ia U Conrad bad ia kata, ym donkam shuh ban dang batai bniah, namar ba wat u matlah ruh, u tip bha, shano ba ka lynti kan ialam.

Kane ka jait politics, ka trei kam bha ha India, ha kaba ka sorkar BJP, ka la nion ia bun bah ki nongialam, kiba don sha ka liang pyrshah bad mynta ka kdew shai, ba lada ka BJP, ka pyndonkam ia ka CBI, ED bad kiwei, kumta ka sorkar NPP, ka pyndonkam da ki pulit jong ka Tura, ban leh da kajuh ka lynti bad lada kane ka jait politics, ka la sdang, kumta ngin sa iohi, ia shibun ki riew sain pyrthei, ki ban bam ja dai, ha ki sngi ban sa wan.

Ka BJP, ka la kob lypa, ia U Conrad Sangma, ban iakhun beit tang na kawei ka Constituency, na South Tura bad ngin dang ia peit, la utei u khun rangbah U Purno Sangma, un nud ne em ban pyni, ia ka jingdap shynrang jongu, ban iakhun beit tang na katei kawei ka Constituency.
Na kaei kaba paw shai, U Conrad Sangma, um pat ju jop elekshon ryntih, kum u hynmen jongu, hynrei, ula shah pynrem ha Selsella, tang hadien shisien long MLA ha u snem 2008 bad dei ban kynmaw ba ka jingjop bun ka NPP, ha u 2018 na Garo hills, ka dei ka vote sngewlem, na ka jingkhlad noh jong U PA Sangma.