Ki kotkhubor kum ka sur u paidbah

Ki kotkhubor, ki long ka sur jong u paidbah bad ki don ka bynta kaba khraw, ha kaba wan rah ia ka sur jong uba bun balang sha ka sorkar bad ki dei ruh ki nongprat lynti ban wan rah ia ka khubor kaba bha, lane ka khubor kaba sniew ha kano kano ka khyllipmat.

Ka Russia, haba ka hiar thma sha Ukraine, ka pyntip lyngba ki lad pathai khubor bad ka pynshisha, lyngba ki dur ki dar kiba paw ha ki kotkhubor bad kumjuh ki jing ia kynad hapdeng ka China bad ka Taiwan bad ki jing ia khie thma hapdeng ka India bad ka China, ki paw lyngba ki khubor.
Ha ka jylla jongngi, la iohi, ba ki nonghikai, ki nongshet ja sngi, ki sengbhalang bapher, ki ioh mynsiem bad ioh jingkyrshan na ki paidbah, lyngba ki lad pathai khubor bad wat ha ka jyrsih jong ka kam pynbeit pud, ngi iohi, ia baroh ki jingshisha, ba ki wan lyngba ki lad pathai khubor.

Lah ban ong namarkata, ba lada kim don ki kotkhubor, kan don ka jing sahdum, ka jingsah bieit bad ka jing kulmar kaba jubor bha, ha satlak ka pyrthei, namar ba ia baroh ki jingmut kiba don ha ki bor synshar pyrthei, yn nym jin da la tip satia.
Kam dei tang katta, wat ia ki kam ba bha ruh, ka sorkar, ka ju pyntip sha ki paidbah, lyngba ki lad pathai khubor.

Ka jingwan ki tekhnoloji ba thymmai, ka la nang pynstet shuh shuh ia ka lad pathai khubor, ha kaba ia kino kino ki jingjia, ym donkam shuh ban ap, da ki bun kynta, hynrei, la lah ban sei madan noh mar mar bad katei ka dei ka juk ki social media.
Hynrei, haba kynmaw, ia ka bynta jong ki kotkhubor, kaba shat ha ka jingmut jong uba bun, ka dei ia ki sla khubor lane ki print media, kiba la don da ki spah spah snem bad u paidlang ka pyrthei, un hap ban tip, ba kine ki lad pathai ba thymmai, kin lah ban duh jait noh, ha kano ma ka por, lyngba ki ain jong ki sorkar lane lyngba ki jingkylla jong ka tekhnoloji lane lyngba ki jingteh kyndon ia kiba pyndonkam.

Ka jingkhie ka khlam corona, ka jingkhie ka thma ha Ukraine bad ka jinghiar ka ioh ka kot, ha ka pyrthei, ka dei kawei na ki daw, kaba la pyndkoh jubor bha, ia ka jing khlain bor ki print media bad ka la dei ka por, ia ka sorkar jylla, ka sorkar India, ba kin tynrong ia ka lyngkor, ban pynim ia ki paia ba saw jong ka synshar paidbah.