Ka jingkieng Umiam ia kiba 10 ton, ka Dwarksuid kam long iaid shuh, na jingkieng aiu; yn pyniaid ia ki ki trok kit marbam

Nongpoh: Ka jingjia kaba la jia hynnin ka sngi u Blei, kata hadien ba la don ki bynta jong ka jingkieng Dwarksuid, ki la twa bad kaba ym long shuh ki kali heh bad kiba kitkhia ba kin iaid lyngba katei ka jingkieng, ka jingkylli kaba mih mynta ka long ba kito ki kali heh ba kit khia bad kiba kit ia ki marbam, kin iaid na kato ka jingkieng.

Katei ka jingkylli, ka la mih na ka sur jong kiba bun ngut ki paidbah, ia kaba lehse ka jingkylli ruh ka dei kaba don nongrim shikatdei eh, namar kumba ka long mynta, wat ia ka jingkieng heh ha Umiam, la mih ka hukum ba ki kali kitkhia, kim lah shuh ban iaid, ha kaba la ailad tang ia kito ki kali kiba kit hapoh ka 10ton.

Lada ka jingkieng Dwarksuid ka dang don hapdeng ka jingmaramot bad ba ka jingkieng heh Umiam, kam long shuh ban iaid ki kali ba la kit ia ka 10 ton, kaba mut ba ka jingeh kaba yn sa mad kan dei ia baroh ki paidbah kiba sah ha Ri Lum Khasi, namar wat ki kali kit ia ki marbam mardih, ruh ki dei ki kali kiba kitkhia bad kiba la thikna ba ki la palat ia ka 10 ton.

Ban pynshisha ia kata, la iohi ruh ba ki la don da ki hajar tylli ki trok kitmar, kiba kynthup ia ki trok kiba kit marbam, ki la shah bat noh ha ki Pulit Ri Bhoi ha ki bynta bapher bapher ka surokbah NH-6.

Ka long ruh ka jingshisha, ba kumba ka long ha kine ki por kiba la dep, kata naduh ba la mih ka jingmaham ba baroh ki kali kitkhia, ba kim dei shuh ban iaid lyngba ka jingkieng heh Umiam, ia kiba kum kita ki kali bad kiba kiew na Guwahati sha Shillong, la btah beit ia ki ba kin iaid lyngba ka jingkieng Dwarksuid, da kaba mih sha Mawryngkneng bad kin sa leit pynhap ia ki mar sha Shillong, kaba la pynlong ia ki nongniah kali, ba kin hap shim khambun ka bai kali bad kaba wanrah ruh ia ka jingkiew dor ki marbam mardih.

Kane ka jingjia baroh, ka mih na ka jingbymler ki nongialam hapoh ka sorkar jylla, kiba ym iohi jngai ia ka jingeh kaba yn sa kynduh, lada mih kano kano ka jingjia ia kitei ki jingkieng, namar kumba ka long mynta, nalor ka jingthut ka jingkieng Dwarksuid bad lada jia ba thud ne ym long shuh ki kali heh ban iaid lyngba katei ka jingkieng heh, kaba mut ba kan sa wanrah ia ka jingeh kaba khraw eh ha ka jylla hi baroh kawei.