Theh tyngka ka Delhi, buk buk ia ki skhim surok ha ka Jylla

Sngewkmen shibun eh, ba ka sorkar India, ka theh tyngka buk buk ia ki skhim surok ha Meghalaya bad ha kane ka kynti, ka bei pisa haduh T.12,500klur, na ka bynta ban pyntrei ia ki surok bapher ha ka jylla bad na katei ka jingkhein, la pyni ba ka jingthmu, ka long ban trei thymmai ia 616 Kilometre ka surok ha ki shnong ki thaw, kiba dang sahdien tasam ha ka jylla hi baroh kawei.

Haba iakren ia kane ka mat, ngi hap ban buh shwa ia ka jing kylli ia kane ka sorkar NPP lane ia u myntri rangbah bad ia u myntri PWD, ba haba ka sorkar India, ka la theh buk buk ka tyngka, kumta balei pat, ba ka dang donkam ban leit pan ram na ki kompeni lane ki ri bapher ka pyrthei ban shna surok lane ha kawei pat ka kyntien, kaba long, ba lada ia ka skhim shna surok, la shu ai ei da ka sorkar India, kumta kaei kaba pynlong ia ka sorkar jylla, ba kan hap ban shim da ka ram, kaba dei ban siew, ha ka sut kaba rem bad kaba hap ban khrong kylla na ki paidbah, kiba iaid ba ieng, da ki phew phew snem.

Kam dei tang kata, na kaei kaba iohi, ha kine ki sngi, ka paw shai, ba ka sorkar India, ka la knieh lut ia ki surok bapher jong ka jylla, khamtam ki National Highway bad ka sorkar jylla, ka dei ban pynshai paidbah, la katei ka dei na ka jingbym lah trei kam jongka, ne ioh lehse, ka dei na ka jingknieh jubor jong ka sorkar India, ia ki skhim surok bad kaba paw shai, ka long ba ka sorkar jylla, kan ioh noh ban leh trai, tang ha ki surok shnong lane ki surok rit, ki bym don jingmyntoi eiei ruh.

Ki jingshisha, ki long ba ki surok, ha ka jylla, kim pat poi satia shaei shaei ruh bad ki dang don bun bah ki shnong, kiba khlem surok bad kitei ki kynthup ia ki shnong sha khappud bad ka Bang ladesh, sha khappud bad ka Assam, sha West Khasi hills, sha Garo hills bad nangta sa ki surok, kiba dang shu dep trei, hynrei ki la jot rathai bad katei ka pyni, ia ka jingtrei torti jong ka tnat PWD lem bad ki paralok jongka, ka NHAI bad NHIDCL.
Lyngba katei ka jing pynbna jong ka sorkar India, kan jin da la bha, ba ka seng BJP, kan sei madan lut khoit ia ka jingtheh tyngka ka Delhi, ia ki surok ha ka jylla bad katno na kitei kiba la iaid kam bad katno kiba dang sah khongreng haduh mynta.