Ka kam ha Shillong, ka jaka interview pat ki pynlong sha Guwahati

Sngew kyndit thret, kumba iuh tdong bsein, ba ki samla pule ka North Eastern Hills University (NEHU), ki la ujor pyrshah sha U Vice Chancellor jong katei ka University, ba kumno u pynlong interview ha Guwahati, ia ka kam, jong katei ka University, kaba don ha Shillong.

Katei ka pyni, ba ka don ka jingdkoh kaba jur bha, ha ka jing treikam jong katei ka University, ha kaba une U Vice Chancellor, uba nabar jylla, ula shu leh, katba u sngew mon bad sngewbit ia ka thungkam thungjam bad lehse, da ka jing ia sngewthuh jingmut bad ki heh BJP na Delhi.

Ka NEHU, ka dei ka University jong ka sorkar India, kaba la sdang naduh u snem 1973 bad kane ka dei ka matti jong U bah GG Swell MP jong ka Lok Sabbha, uba la pynkhih tyngeh sha Delhi, ban pynurlong ia katei ka skul bah jong ka thain shatei lam mihngi, ba kan don ha Shillong.
Kaba sngewsih, ka long ba hadien jong U bah GG Swell, kim don shuh ki sorkar jylla, lane ki MP, kiba mihkhmat sha Parliament, ki ban pyni, ia la ka jong ka iktiar, ha kaba tuklar ia ki kam jong kane ka University bad la iohi, ba kumba ka long ha kine ki sngi lei, ba la lushia lut naphang da ka sorkar India na Delhi, lyngba u remote controll bad ka sorkar jylla lane ki MP bad ki MLA, kim nud satia, wat tang ban saham ruh.

Ka la donkam kyrkieh ia ka sorkar jylla lane ia ki MP jong ka Lok Sabbha/Rajya Sabbha, ba kin pyni teng noh, ia la ka jong ka iktiar ban nym ailad ia ka jing lehmon than jong ka sorkar India, ia kane ka University bad kaba ha khmat duh, ka dei ban don ia u Vice Chancellor, uba dei u trai jylla bad nangta, ban don ia ki nong hikai kiba tbit bad kiba don bynta, ha ka jingtrei kam jong ka University, da ki trai shnong, kiba lah ban sngew kitkhlieh kham bun shah, ban ia kine kiba wan na shabar.

Haba shu peit, la iohi, kumba kiba wan na shabar jylla, kim don ia ka jing kitkhlieh, ban kyntiew ia katei ka University bad ka dei na kata ka daw, ba ka NEHU, ka nang hiar na kawei ka snem, sha kawei pat, ha kaba ia nujor ha ka jinglong jingman jong ki University ha India bad lada ka long ha kane ka dur, ka poi kan sa poi, ba ka NEHU, kan dei ka skul, kaba ym don ba kwah shuh ban leit pule.