Khyndiat bnai mynshwa, ka Nirmala Sitharaman, myntri ka sorkar India, ka la byrngem tyngeh ia U Deputy Commissioner jong ka Birkur ha ka jylla Telengana bad katei ka dei na ka daw, ba ka dur jong U Narendra Modi, myntri rangbahduh ka Ri, kam don satia ha ka dukan die khaw reshon, ha katei ka shnong.
Katei ka jingbitar jong ka myntri, ka don la ka jong ka daw, namar ba ka Telengana, ka dei ka jylla, ba synshar da ka seng trai ri, ka TRS bad ka lah ban long, ba katei ka sorkar jylla, ka kam trai sha lade, ia ka skhim sam khaw jong ka sorkar India.
Ha ka jylla jongngi ruh, la iohi, ba kane ka sorkar NPP, ka kam trai lut khait ia kiba bun bah ki skhim jong ka sorkar India bad kawei na kitei ka kynthup ia ka Health Insurance, lane kaba la tip kum ka MHIS, kaba dei ka skhim, ka bym trei kam bha satia ha ka jylla bad kaba dei ka skhim T.5lak jong ka sorkar India, kaba la tip, kum ka Ayushman Bharat lane ka PM JAY.
Haba phi leit sha ki shnong ki thaw, phin iohi, ia ki dur ki dar ha ki kali, ki dur ha ki kynroh bad ki jingtah dur, ha ki rud surok, ba la ju pyni shynna, ia U Conrad Sangma bad nangta, ki don ruh kiba la sieh ia ki arngut shi para bad U James K Sangma.
Ngi iohi bha, ba haba don ka jing sahkut ki jingdawa, kum ka ishu ktien Khasi, ishu ILP, ishu khang dewiong, mawshun, lane ka tulop ki nonghikai, ka jingsiew ia ki nongshet ja sngi, ba ki pynkitpop beit beit ia ka sorkar Inda; katba ia kito pat kiba wan tuid beit beit khlem jingtap, kin kam trai halade hi.
Kine ki jait jingjia, ki pynduh noh ia ka jingshaniah jong ka sorkar India bad ki dei kiba kum kine ki khep, kiba pynlong ia ka myntri jong ka sorkar India, ba kan leit byrthen ia U Deputy Commissioner ha Telengana, namar ba ka sorkar jylla, ka kwah ban kam trai lut halade hi bad ki dei ruh, na kine ki daw, ba ka sorkar India, ka nang knieh noh ia ki bor jong ki sorkar jylla, namar ba kim ju nang ban ai burom, ia kaba dei ka bhah, kaba wan na Delhi.
Ka BJP, ka dei ban pynbna iar noh nangne shakhmat, ia ki skhim kiba wan na ka sorkar India, ba ki nongjied kin tip shai lane ha kawei ka kyntien, ba haba ioh ia ka money order, ka burom hap ai sha u nongphah, ym dei sha u nongrah.
Phi don ban ong eiei?