Ki ishu bapher jong ki sengbhalang, ki sah ha lum; la 50 snem

Ka sengbhalang ba dang thymmai ka HITO, ka byrthen ha ki khyndiat sngi ba ladep, ba kan pynkulmar, ia ka tamasa synrai, ka ban sa sdang shen, ha ki khyndiat sngi ban sa wan.

Ngim tip, ia kaei ka jingmut kaba don ha katei ka seng, la ka dei ka jingmut ba shisha, ban pynduh jait ia ka ain ia khalai, lane ioh lehse, ka don pynban sa ka jingleh politiks, namar ba ka la hajan eh ka elekshon.
Hynrei ka mat, ba ngin iakren hangne, ka long, ba balei sha, ki ishu jong ki sengbhalang, ki shu sah ha lum mynta la 50 snem, ha ka jingiaid lynti jong ka sorkar Meghalaya bad kitei ki kynthup ha ka ioh kam ioh jam, kaba la shu pyntreikam sah da kajuh shi kajuh, kaba la shu nion bein ia U Khasi, Jaintia, uba don 17lak, tang da i 40 percent, kaba ia ryngkat bad U Garo, uba don 10lak antad.

Haba peit ha kine ki sngi, ngi iohi shai, ba kam dei shuh, ia ki sengbhalang, ban ia bunkam bad kine ki politician ba mynta ha Secreteriat, hynrei ki dei ban sdang noh da ka movement, ban leit sha ki paidbah, ban ioh da ki nongialam, kiba shemphang bad kiba sngewthuh ia ka jingtied jong u thidsnam jong u paidlang ka Ri.

Ban ia kaba ki pynlut por, ban leit lum lymbung ha khmat Secre teriat, ki la dei ban leit ban lum ban lang ia u paidlang ka Ri, sha ki Constituency bapher bad ban ai jingmut ia ki paidbah, ba kin jied ia ki kandidet kiba tip bha, ia ka imlang sahlang, ka ain ka kanun.
Ki sengbhalang, ki tip shai, ba kim don lad satia ban kiar ialade na ka politics bad kumta, ki dei ban wad ia ki riew shemphang, kiba u paidlang ka jylla u shynrain ia ki bad wat ki nongialam na Delhi ruh kumjuh bad dei ban kyndang noh mardor, da ka sur uba bun balang, ia kito kiba shah kynnoh bamsap bad kiba khlem akor ka longbriew manbriew jongki.

Na kaei kaba paw mynta, ka pyni shai ba ki seng India, lada dei ka Congress ne mynta ka NPP bad ka BJP, kim shym don satia ia ka thong ban pynurlong ia ki jing dawa jong ki sengbhalang bad katei ka pyni shai, ba ki seng India, kin pynthaba ia ki shnong ki thaw, da ka roi ka par, ka bym larkam eiei; hynrei kin set slung ia ka jingstad bad ka jing shemphang jong ka bor jabieng jong ki khun ka Ri, ba kin ieng, ha la ki jong ki kjat, ba kin saindur hi, ia la ka jong ka lawei.