Dei ban tih jylliew, ia ka bamsap ki pulit

Ha ki khyndiat sngi ba ladep, ki pulit, ki la kem ia u Assistant Inspector General (AIG) jong ka tnat pulit ka jylla, U bah Gabriel K Iangrai, uba dei uwei na ki nong pathai khubor jong katei ka tnat, ha ki bun bun snem ba ladep; hynrei kaba sngewsih, ka long ba ha lyndet jong ka kam pathai khubor, u dei pleng, u nong bamsap ba shyrkhei jong ka tnat.

Ka mat hangne, kam dei shuh tang ia utei u briew shimet, namar ba un nym lah satia ban thied kali, ban theh petrol man ka sngi, ban set ha iing lajong, da ki 29 tylli ki kali, lada kam don ka jing ia sylla lang bad kiwei pat.
Kam dei tang kata, hynrei, la kynnoh ruh, ba kiba bun ki kali jong utei u heh pulit, ki dei ki kali ba khlem kot khlem sla bad katei lei lei, ka la nang pynkyndit shuh shuh, namar ba ka paw shai, ba kat ki pulit ruh, ki thied pleng ia ki kali kiba shu die tuh, ha ki iew ki hat paidbah.

Ka burom, ka leit sha u rangbah Riewad V Warjri, uba la leit sha kashari, ban tih tyllong ia kane ka jingjia; hynrei kumba la kren haneng, ka kdew shai, ba haduh 29 tylli ki kali ban pyniaid da uwei u briew, ka dei ka bym lah long bad katei ka pyni shai, ba ki dei ban don lang ki langiong, kiba don bynta ha kane ka kam tuh petrol, tuh kali bad sa kiwei de ki kam beain halor katei ka phang bad utei u rangbah, uba long shlur ban khynra ia katei ka kam tuh, ula dei ban iaid shakhmat, ban dawa ia ka kashari, ba kam dei tang ban kurup ia ka spah ka phew jong utei u heh pulit, hynrei, ka dei ban da iit bniah ruh, ia ka jingrung jingmih ka pisa na ka account jongu ban nang lap shuh, ia kiwei kiba don bynta ha katei ka kam tuh, kam bamsap kaba shyrkhei bha, kaba la iaid bun bun snem.

Kham mynshwa, ka la don ka jingkynnoh, na U bah Disparsing Rani, u nongwad RTI, ba ki pulit, kiba ju khynra kali bad dain kuna sngang sngang ia ki kali kamai, ki ju leit ju wan ialade da ki kali, ki bym biang kot biang sla satia bad lyngba kine ki jingshisha ar tylli, ka la dei namarkata ia katei ka tnat pulit, ba kan sdang noh ia ka internal enquiry jongka, halor ka jingdon kali jong ki pulit jongki, ka jingdon ki kot ki sla kiba biang bad wat ka jingdon kamai jongki ruh, ka la dei ban paw da ka jingkhein, kaba shai, ban khanglad ia ki kam tuh, kiba la paw pyllein, ha katei ka tnat ha kine ki sngi.