Sha ka 55 snem, ka rta shongthait, ia kiba trei kam sorkar, ong u myntri

Shillong:La dei por ba ka sorkar Jylla ban pynhiar noh ia ka rta shongthait jong ki nongtrei ka Sorkar Jylla na ka 58 snem sha ka 55 snem, pyn sngew U bah Renikton Lyngdoh Tongkhar Myntri ka Tnad PHE bad MLA ka Mawkyrwat.

U Bah Renikton Lyngdoh Tongkhar, u la pynpaw ka jingai jingmut shi met jong u namar u iohi ia ka jingiakhih ki khun samla ha ka Jylla ha ka jingkyrduh kam.
Lada ka Sorkar ka lah ban pynhiar rta noh ia ki nongtrei kam Sorkar, kan plie lad ia ki khun samla ban ioh kam ha ki tnat treikam ka Sorkar Jylla.

U bah Renikton, haba iakren bad u nongai khubor, u la pynpaw ia ka jingsngewkhia jong u halor ka jingpynsngew ki samla haba iadei bad ki lad ioh kam ha ki ophis Sorkar bad kiwei kiwei ki lad ai kam ai jam. Une u Myntri u la ong ba kane ka jingpynpaw kaba mih na u shimet ka long ka jingai jingmut ha kaba kito ki nongtrei Sorkar lada ki shongthait noh ha ka rta kaba 55 snem, ka long ruh ka lad ym tang ban plie lad ia ki samla ban ioh kam.

Ha kajuh ka por, une u Myntri u la ai jingmut ba ha ki tnat treikam ka Sorkar kiba ym pat lah ban thungkam noh na ka daw ka jinglynshop ka khlam COVID-19 bad kiwei ki daw, donkam ban nang thungkam noh shwa shipor khnang ba ki khun samla kin ioh kam ban trei bad myntoi katba dang ap ban bud ia ki kyndon thungkam lyngba ka Meghalaya Public Service Commission (MPSC) bad District Selection Committee (DSC) ha ki district bapher bapher.

Ha kawei pat ka liang, u Bah Renikton, u la kubur ba ka jingpynsngew ki samla, haba iadei bad ka jingkyrduh kam ka long ka mat kaba donkam bha ha kaba ka Sorkar ka dei ban shimkhia.
U Bah Renikton u la kyrshan ruh ia ka Sorkar, kaba la shim ia ka rai ban pynjlan ia ka rta wad kam da 5 snem ha kaba kito kiba la kut ka rta ban thep kam Sorkar ki la ioh biang ka lad ban iakhun ia ki eksamin thungkam bapher bapher ha ki tnat treikam ka Sorkar Jylla da ka jingpynjlan ia ka rta ban thep kam na ka 32 snem sha ka 37 snem.