Kam trai u heh spah, ia ka hima ki bneng

Ka politiks te, kaba da sngew khyllah shisha, ha kaba la iohi, ba U Ma Dakashiat Lamare, uwei u politician samla jong ka seng NPP, ula kam trai lypa ia ka hima ki bneng ruh bad u aidaw, namar ba u iarap ia ki riew shem lanot, kiba shem jynjar shipa.

Lada iakren halor ka jing kordit bad jynjar jong ki paidbah, kaba kham jubor bun phew shah, ban ia ka Nongkrem, ka dei ka Mawhati Constituency, namar lada iakren tang ia ka surok ruh, kaba bun katei ka thain, kam don satia ki surok kiba biang, katba ka Nongkrem, ka la biang lut, khamtam ha ki surok bah.
Nangta lada ka wan ka jingduk tasam ruh, ki briew jong ka thain Mawhati, kin kham bun kiba duk bun shah, ban ia ki paidbah ka Nongkrem bad kumjuh ia ka pule puthi, ka koit ka khiah, kan nym iahap satia bad katei ka jaka, kaba hap sha khappud Assam.

Na kaei ka jingkren jong u myntri, ka pyni shai, ba u riew sain pyrthei, uba ai jing iarap ia ki duk ki raitoi, u dei uba hok bad uba bit tam ban shong ha ka jaka shong, kaba ha khmat duh jong ka hima ki bneng; hynrei halor katei ka kyntien, ka baibl, ka ong, ba kan kham suk ia ka ut, ba kan ioh phrung ialade ha u thliew thyrnia, ban ia kaba u riewspah, un ioh ban rung sha ka hima ki bneng.

Kam dei tang katta, ha kajuh ka por, ka wan ka jingkylli, ba la katei ka jingiarap, ka wan na ka umsyep jong u briew shimet, ne ioh lehse, ka dei pynban, ka pisa jong u paidbah, kaba la ioh lum na ka tulop jongu, kum U MLA, kum u myntri sorkar lane na kiwei ki kam khaii khaba bad lada ka long kumta, katei ka pyni, ba kam dei satia ka jingiarap, hynrei katei ka dei ka pisa paidbah bad kumta kam dei satia ka pisa, ka ban leit sha Nongkrem bad ka dei ban leit sha u paidbah ka Mawhati.

Ba ka kam kan shai ha khmat jong u paidlang, uba jied ia utei u MLA samla na Mawhati, kan kham bha shibun, ba un pyni, da ki jingkhein jingdiah kiba shai, ia ki kam samaria ba bha jongu, sha katei ka shwa ka Constituency, kaba la dep jied ia u, ha u snem 2018 bad kumno, ba ula pyn donkam ia ka MLA skhim jongu bad lada ula lah ban sei ia katei ka jingshisha, kumta ka jingkam trai jongu, ia ka hima ki bneng ruh, kan kham don ia ka nongrim, ha khmat jong u briew U Blei.