Nang jur, ka jingiakhih ia ka Garoland

Ka jing iakhih na ka bynta ban ioh ia ka Garoland, ka la nang iaid shakhmat ha kine ki sngi bad la iohi ruh, kumba ka la nang kham jur, lyngba ka jingialang paidbah, kaba la pynlong ha ka Sngi Saitjain ba ladep ha Tura, ha ka jingialam jong ka Garoland State Movement Committee (GSMC).

Kat haduh mynta, ngi iohi, ba ka jingdawa Garoland, ka dang iai bteng bad ka nang kham jur, na kaba ju long baroh shi katta, hynrei ka jingdawa ia ka Khasiland, ka la nang daitthah noh, hadien ka jingkhlad noh jong u heh duh ka HSPDP, U bah Hopingstone Lyngdoh.

Ka jingkren jong uwei na ki nongialam sengbhalang, ha katei ka jingialang, ka long kaba donkam shibun ban sngewthuh, ba haba la ia rai ban ia khlad la ka jong ka jong, kumta dei ban iamih da kaba suk ba sain bad kaba sngew tynnad bad ym dei ruh ban ia tamti tamjat ia ka jong kiwei bad kata ka long ba ka Ri Khasi, kan dei ia ki Khasi bad ka Ri Garo, kan dei ia ki Garo bad kam bit ban don ka jing ia kam trai, ia ka jaka jong kiwei pat.

Haduh mynta, ka don ka jing bymhun ia ka ioh kam ioh jam, ia ka bhah kam hapdeng kine ki ar tylli ki jaitbynriew, ha kaba ki Khasi, ki sngew ba ka tarajur, ka noh shiliang sha ki Garo bad ki Garo ruh, ki sngew hi kumta bad lada ka wan ka ka jylla ba kyrpang, kumta kin ioh ban ia tare dalade ia ka dohkshong suda.
Ki don ki jylla kiba rit, lada dei ka Sikkim, ka Mizoram, hynrei kitei ki la ioh ia la ka jong ka jylla bad kitei ki don ia ki dkhot kiba tang 40ngut ha Mizoram bad sa 32ngut ha Sikkim bad kitei ki jylla, kim don jingmih eiei ruh em; katba ha Ri Khasi lane ha Ri Garo, ki don byllai ki jingmih naduh ka spah ka mei ramew, ka kam shang pyrthei bad sa shibun ka spah kaba ngi lah ban ieng, ha la ki jong ki kjat.

Kam dei tang ka spah, hynrei ka ktien ka thylliej, ka dustur ka riti bad wat ka rukom bam rukom dih, ki don ka jing iapher hapdeng U Khasi bad U Garo.
Ka sorkar India, kam dei ban leh shiliang, halor kane mat bad ka la dei ban sngap thuh, ia kaei ka jingkwah jong uba bun balang bad kan jin da la bha, lada kan pynlong da ka elekshon kaba kyrpang lane ka referendum ha Khasi, Jaintia bad ha Rilum Garo, na ka bynta ban shim ia ka rai u paidlang ba bun.