Ai khublei sorkar bad MR; ki nongmihkhmat Jirang bad ka kynhun dawa Patharkhmah Civil Sub-Division ba la urlong ka jingdawa

Nongpoh: Khyndiat kynta ba u Conrad K. Sangma, Myntri Rangbah ka sorkar jylla, u la kren hakhmat ki paidbah ha madan Byrnihat bad uba la pynpaw ba ka jingangnud ki paidbah ban kyntiew kyrdan Civil Sub-Division ia ka Patharkhmah Administrative Unit, ka la urlong bad kaba yn sa plie noh shen, ki nongmihkhmat ka Jirang Constituency, ha ryngkat kawei ka kynhun kaba la tip kum ka Patharkhmah Civil Sub-Division Demanding Committte, ki la ai ka jingkhublei kaba kyrpang eh ia ka sorkar jylla bad khamtam eh ia u Conrad K. Sangma.

Haba kren sha ki lad pathaikhubor, u Bah Sosthenes Sohtun, MLA, nangta u Bah Victor Rani, MDC ha ryngkat ki nongialam ka Patharkhmah Civil Sub-Division Demanding Committee (PCSDDC), lyngba u Bah Esman Lyngdoh, ki la ai ka jingkhublei kaba kyrpang eh, ia u Conrad K. Sangma, Myntri Rangbah ka sorkar jylla, namar ki sngew ba katei baroh ka urlong, ka dei namar ka mynsiem iarap paidbah ka Sorkar bad u Myntri Rangbah.