Syllad ka eriong, shah ktah jur ka Hingaria, shah rat ka skul bad ki iing briew

Shillong: Ka shnong Hingaria, kaba hap hapoh East Jaintia hills district bad Sutnga Saipung constituency, ka la shah syllad ha ka eriong, ha ka 24 bad 25 tarik mynta u bnai. Ka jingsyllad ka eriong, ka long kaba jur bha haduh ba la rat ia kawei ka iingskul Lower Primary School Hingaria bad ki iing shongbriew.

Ki paitbah nongrep, ki la shah ktah jur ki mar rep kum u kwai kiba ki briew jong ka shnong ki shaniah bad kamai jakpoh bad mynta ba la jan dei ka por kheit. Kumta ki bor shnong ki kyrpad ia ki bor sorkar ban ai ki jingiarap ba kham kloi sha ki paitbah ba shah ktah bad khamtam ia ka iing skul, ba la shah rat khnang ba ki khynnah skul ki ioh ban pynlong skul biang, ong ka kyrwoh na U bah T Khonglah, Waheh Chnong Hingaria.