Shillong: Ka Khun Hynniewtrep National Awakening Movement (KHNAM), Youth Wing, ka la ap la bun bnai ban iakynduh ia u myntri rangbah ka jylla, hynrei mynta ka sngi, ka la wan buh, da ka dorkhas ha ophis, u myntri rangbah ka jylla bad ha katei ka dorkhas, la pyntip, ba ka sorkar India, bad haduh 25 tylli ki jylla ha ka Ri India ki la dep ban weng noh ia ka jingkhot personal interview na ka bynta kiba them kam sorkar ha ka kyrdan Gp, B, C bad D naduh u snem 2016, hynrei haduh mynta ka sorkar jylla kam pat lah ban leh eiei.
Kumta na ka liang ka seng ka la wan buh da ka jingthoh (memorandum) ban dawa na ka sorkar jylla ban pynduh noh ia ka interview na ka bynta ki kam sorkar. Ka jingkhot interview ka dei tang ka lynti lane ka kabu ia ki long heh long hain bad ki minister ban tuklar ha ka jingioh kam sorkar khnang ban ioh jingmyntoi politic. Ki samla kiba dei hok kim ioh kam satia, namar ba kim ithuh bad iajan bad ki briew ba don ha ka bor, ka la poi ruh ka bynta haduh ba, shwa ban thep kam sorkar ki samla ki pyrkhat shwa la ki don ne em ki ban iarap ia ki.
Kumta ban rat dyngkhong ia ka jingthung kam buhrieh lane thung kam sop sop jong ki bor ba halor, ka seng, ka dawa jur ba ka sorkar jylla kan weng noh ia ka jingkhot interview bad ban peit beit tang na ka written test haba rai ban ai kam sorkar. Lada ka sorkar kan leh kumta ka mut wat ka sorkar ruh ka lah ban kunai wat ia ka pla pisa lajong ruh, namar ka don ka jinglutphut haba pynlong ia ka interview, ong ka kyrwon na U bah Thomas Passah, President, KHNAM, State Youth Wing.
Ka Biang bha katta ka proposal.