Thaw ka KSU, da ka khyrdop ILP

Ka Khasi Students Union (KSU), ka la plie, ia la ka jong ka khyrdop talasi mynder ha East Jaintia, na ka bynta ban teh lakam ia ka rung ka mih jong ki bar jylla.

Ban teh lakam ia ki briew kiba nabar, ka long kaba dei eh bad kaba bha palat, hynrei ka jing shisha pat, ka long ba ka KSU, kan nym lah ban leh dalade ia katei ka kam radbah, namar ba ka dei ka kam kaba bam bor bad kaba bam por bad kaba donkam ruh shibun ki briew kiba dei ban trei ia katei ka kam bad kumta, ka jingleh jong katei ka seng, kan long tang kum ka jing pyn kyndit biang sa shisien ia ka sorkar Jylla bad khamtam ia ka sorkar India, ba kan pyn urlong noh mardor ia ka mat jing dawa ILP ha ka jylla.

Ki dak ki shin, ki kdew ba ka jing dawa ILP jong ka jylla, kan nym pat urlong satia ha kine ki snem, ki ban sa wan bad haba ka long kumta, kaba donkam, ka long, ba ngin pyntrei kam noh shwa da ka ain U Mukul Sangma, ka MRSSA lane ba ki Syiem, ki Sirdar, ki Rangbah Shnong, kin teh lakam, da ki ain jong ka District Council, kiba khanglad ia ka jingwan rung ki bar jylla, ban trei ban ktah, ban khaii pateng lane ha kajuh ka por, ba kin thaw shuh shuh, ia la ki jong ki ain, kum kaba khang ia ka jing ia shong kha khleh bad kiwei de ki ain kiba iahap.

Ka la dei ka por ia ka District Council, ba kan shim ia ki kyndon kiba kham eh bad kiba kham khor shi katdei, da kaba sngap ia ka sur jong uba bun balang bad kata ka long ban teh lakam mardor ia kane ka jingwan tuid jong ki briew kiba nabar jylla bad kumjuh ia ki poiwir kiba nabar Ri, namar la iohi, ba ki khar Bangladesh, ki ju thaw ia ki lad ki lynti, ban phrung sha kane ka jylla.

Na ka liang jong ki shnong ki thaw, ki hap ruh ban mynjur, ba ka jingiohlad jong ki briew, kiba nabar, ka dei na ka daw jong ka jing synjor ki kyndon shnong bad katei ka paw shai, ba ha ki shnong, kiba ka jing synshar ka skhem bad ka pyrkhing, kumta ki duna bha, ki bar jylla, kiba ioh ban buhai shnong, ban ia shongkha khleh bad ban trei kam trei jam; hynrei ha ki shnong kiba synjor, kitei ki briew kiba nabar, ki la ioh lad ban leh trai khlieh bad ki jingshisha, ki kdew shynna, ia kaei kaba la jia ha Iewduh, nangta, sa ha ki dong ha Shillong, kum ha Polo, Laitum khrah, Laban bad sha Jaintia Hills, kum ha Lad Rymbai, Khliehriat nalor kiwei de.