Wat bieij pisa ïoh jemdaw, ka lawei ba shyrta ki khun, ong U bah Sanbor

Shillong: “Mynshwa ha ki ilekshon MLA ba la dep hapoh Laban Constituency ki shait ïalap kynshoit ba ym dei ban pynjop ïa ki kyrtong BJP ba ïoh shah khang bam bad die doh masi, shah khang ki Ïingmane, hynrei katba jop ki BJP ha Meghalaya kam ju don kum katei kaba ki kynnoh,” ong u MLA ka 19 South Shillong Konstitwensi u Bah Sanbor Shullai uba long ruh u Myntri ka sorkar jylla, ha ka sngi Saitjaiñ.

Ula bynrap ruh da kaba ong, “Ha kine ki snem ba nga la ïeng na ka BJP ki ong u Bah Sanbor uba kham dakaid un sa thang syndon ïa ki Ïingmane baroh, khang doh Masi, hynrei mynta ba nga jop na ka BJP khlem ïohi ïa kita baroh, nangkhlaiñ shuh shuh ka bam doh Masi bad kitei kiba kynshoit ha ki por ilekshon shano ki jah ha ka por ba u duk u suk u mad jynjar hapor Covid 19, bad haba kyrduh pat ki wan wad ïa u Bah Sanbor, sngewbha ha kane ka ilekshon 2023 wat ym sngap shuh ïa kine ki nia kynshoit, wat la nga ïoh tang khyndiat percentage ha u 2018 na Laban, hynrei nga khlem ieh ïa ka Laban, wat ki bym kyrshan ruh ngam ju pynleit thylli.”

Ïa kine ki kyntien u la kren ha ka prokram buh ïa u Mawnongrim ban shna ïa ka surok ïaid kali hajan ka Community Hall shaduh Raid Laban forest ha Madan Laban ha ka jingmang pisa kaba T. 84,23,000.00 lak kaba la mang hapoh ka State PWD roads, SPA Scheme 2021-2022.
Kawei pat ka jingplie ïa ka Children Green Spaces Park Cum Play Field, Madan Laban kaba la dep shna, kaba la mang hapoh ka Atal Mission for Rejuvenation and Urban Transformation (AMRUT), Scheme 2019-2020.

“Wat pynsep ei ïa ka vote, kiwei ki jaitbynriew kida kit wat ïa ki tymmen ki kro ban leit thep vote, hynrei ki jong ngi pat ha ki sngi thep vote leit picnic, rah rymmiang khwai bad kiwei kiwei. Ha ka MDC ilekshon na ka 100% tang 40% ki KHADC kiba thep vote, wat la ïa ka MDC thep vote tang ki Khasi,” ong u Bah Sanbor.
Haba kyntu ïa ki nongshong shnong ba ym dei ban beij pisa u la ong, “Lada phi die ïa ka EPIC ka long kumba die la ka long rynïeng lajong bad phin long kiba jemdaw bad kato ka 1 hajar kaba phi shim kan pynim ïa ka lawei ki khun ki kti ki pyrsa shyrta jingim, ne ngi kwah ba ki kam pynroi ki neh sah kumjuh bad yn jur tang ka bamsap bad bun ki khun samla ruh da ki phew hajar kin leit wad kam shabar namar la kyrduh kam ha jylla.”

U la pynkynmaw ïa ki Nongshong shnong ba kim dei ban klet ba hapoh ka jinglong MLA u la lah ban pynïoh da ki klur ki kam pynroi ha baroh ka Konstitwensi, kynthup ïa ki skhim shimet, ki surok, community hall cum market complex, ki indoor sports hall kiba lah da ki 40 snem khlem poi shaei shaei ruh bad lut kai ka pisa mynshwa ka bai sha da ki phew hajar ban pynlut haba wan kular ki Myntri sorkar.

“Nga sngew kumba phohsniew bad ym lah mutdur hapoh ki samoi treikam kum u MLA la lah ban wanrah bun ki kam pynroi, bad kane kadei ka jinglehrit, treishitom ha ryngkat ka jingïatreilang ki nongkitkam shnong. Mynshwa ym ju ïoh NOC na Shillong Cantonment Board lada kwah leh kam pynroi, hynrei mynta ba nga dei u MLA BJP na Sorkar Pdeng phah ai NOC ba mynta la ïohi kam pynroi ha ka SCB, wat ki shipai ruh ki sngap bad wat ki Peon ruh nga ïadei paralok haduh ki kyrdan ophisar,” ong u Bah Shullai.

U la kyntu ruh ïa ki Nongïalam Shnong hapoh ka jingïalam u Rangbah Shnong Bah Ïostar Sun ban phah ki proposal kum ïa ki 2 tylli ki surok, ka Multipurpose hall cum Mini shopping complex nalor kiwei kiba ka shnong ka dang donkam.
Ha katei ka sngi u MLA u la aiti ïa ki kot ki sla, u shabi ka Children’s park ban peit pynïaid ka shnong, bad la don ruh ka jingot cake bad kiwei ki prokram.