Ka Supercare Hospital, ka hospital ba nyngkong eh ha ka jylla, ban ithuh da ka NABH

Shillong: Ka Supercare hospital, kaba dei kawei na ki jaka ai jingsumar ba la pyniaid da ki riewshimet, kaba don ha Demseiñiong, Sawlad, Shillong; ka dei kawei na ki hospital ba nyngkong tam hapoh ka jylla Meghalaya ban ioh ia ka jing ithuh na ka National Accreditation Board for Hospitals and Healthcare provider.

Ka NABH ka dei ka kynhun jong ka Quality council of India (QCI), kaba la buh ban peit ia kino kino ki jaka ai jingsumar kiba biang, ki rukom pyniaid bad treikam jong ki. Ka NABH ka dei ruh ka dkhot jong ka International society for equality in Healthcare (Isqua) ka kynhun jong ki nongpeit ia ki jaka ai jing sumar ha kylleng jong ka pyrthei.

Ka NABH, ka buh ia ki kyrdan ia ki jing sumar kiba biang tam, ki rukom treikam jong ki, ha ka ri India baroh kawei.
Ki don ar jait ki jingithuh ia ki jaka jingsumar allopathic ha India, kawei ka dei ka Full-NABH, kaba ia hap iakito ki jaka ai jingsumar kyrpang bad kiba ai jing sumar kyrpang shuh shuh, katba kawei pat ka dei ka Entry level NABH, kaba peit bad kdew tang ia kito ki jaka ai jingsumar ki bym don ia ka kyrdan ban ioh ia ka Full-NABH.

Ka Supercare hospital ka la ioh ia ka jing ithuh, na ka NABH, kum ka NABH entry level ha ka 5tarik u bnai Risaw 2021, katba ia ka jingithuh ba pura, kum kawei na ki jaka ai jingsumar ha ka Full NABH, ha ka 29tarik Nailur 2022. Kane ka jingithuh jong ka NABH, ia ka Supercare kan long saw snem, kata ka long ba kan kut ha ka 29tarik Nailur 2026.
Ka jing ioh jingithuh jong ka Supercare hospital na ka NABH, ka dei ka kawei na ki jingmyntoi ba ka wanrah ia ka jing sumar ba bha bad ka jingshngaiñ ia kiba shah sumar ha kiba kum kine ki jaka ai jingsumar.

Ym tang katta, ki jaka ai jingsumar kiba la ithuh da ka NABH hi,k i nongpang ki ioh ia ka jingsumar jong ki, na ki nongtrei ba la shah hikai pyntbit, ia ki hok jong ki nong wan shah sumar la iada bad khmih ruh na ka por sha ka por.
Ka jingithuh jong ka NABH, ym tang ba ka ai jingmyntoi ia ki nong shah sumar, hynrei kiba trei ha kane ka jaka ai jingsumar ki ioh lang kum ka jinghikai, ka jing long nongialam ba kham bha bad ka jinglong trai ha ka sumar sukher, nalor kiwei pat.

U nongseng bad u khliehduh jong kane ka jaka ai jingsumar, u la ong ba ka jingithuh jong ka NABH, kan pynkhlain shuh shuh ia ka jingtreikam jong kane ka hospital, ha ryngkat ki thong kiba pher ba pher, ban buh ia ka jingsumar ba bha ha ka jingkoit jingkhiah bad ka jingsuk,ban pynbha ia ka rukom im jong ki baroh ki briew ha ka imlang sahlang. U Dr Thangkiew ryngkat bad ka kynhun jong ka Supercare hospital ki kwah ban ai ka jingshakri ba bha tam ha ba iadei bad ka rukom ai jingsumar ba paka tam ha ka jylla bad ka Northeast hi baroh kawei.
Ka Supercare hospital hi, kumba long haduh mynta ka don ia ki tiar sumar ba katkum ka juk mynta, ryngkat bad ki doktor ba tbit tam.
Ka jingthmu jong ka Supercare hospital hi, ka long ban long ki nongtbeh jingshai ha ka jingaisumar ba thymmai kat kum ka juk shai ba mynta, ki lad bad ki rukom pyrkhat ba iadei bad ka koit ka khiah.