Pynkhreh bus ka FKJGP EJHD, ïa ki samla leit rali sha Shillong

Shillong:Na ka liang ka tnat treikam jong kane ka Seng hapoh East Jaiñtia Hills District Khliehriat, kaba la tip kum ka FKJGP East Jaiñtia Hills District Khliehriat kan mih madan lang ban dawa ïa ka Sorkar jylla ban leh eiei na ka bynta ki samla kiba la pyndep ïa ki jingpule ha ki laiñ bapher bapher.

Khnang ban seisoh ka jingdawa da ka jingïaid paidbah (Public Rally) ka Seng ka khot ïa ki samla pule napoh ka District ban ïa kyrshan met bad mynsiem ïa kane ka mat, ym ban shu ïa sngap jar, namar ka dei ka hok jong ka jaitbynriew ban dawa, khnang ba kan long kum ka jingkyrsiewthiah ïa ki nongmihkhmat ba ïoh thiah lyngngai ha ki jingkynoi ka jingthiah ki palong ka jingbamsap bad ka jinglehbeiñ ïa ki samla ka Jylla Meghalaya.

Na ka liang ka Seng ka pynpaw ba ka da sngewkhia eh ïa kane bad da ka jingkyrpad ïa ki samla kiba kwah ban ïa snohkti lang, ka Seng ka khot ïa ki samla ban ïawan sha kane ka rally ka ban pynlong da ka Seng ha ka 28/10/22 da kaba sdang ïa ka jingïaid paidbah naduh Motphran haduh Madan Ïewrynghep (Fire Brigade) ïa kaba yn sdang naduh 11:00 baje mynstep.

“Te khnang ban ïaid beit bad ïaid ryntih ban pynsuk, ka Seng ka kyntu kino kino ki samla kiba don jingthmu ban leit sha kane ka jingïaid paitbah hapoh Sor Shillong na ka liang ka Seng FKJGP East Jaiñtia Hills District Khliehriat ka kyntu ba phin ai jingtip sha ka Seng ha kine ki number phone harum 60005 05549/70056 66928 khnang ba ka Seng kan ïoh ban pynkhreh ïa ki bus ban leit shaw ïa phi ha ka jaka ba ngin sa pynbeit shen,” ong ka kyrwoh na u General Secretary ka Seng Bah D.H Sumer.