Pynlut da ki klur, khlem ioh medal satia, ha ka National Games

Shillong:Ka Trinamool Congress Meghalaya, lyngba U President jong ka Trinamool Youth Congress Meghalaya, u bah Bansharai Pyngrope, u la ong ba ka jing ioh khur takma jong ka jylla Megha laya, ha ka national Games ba dang shu dep ka la hiar na ka 3tylli ki medal sha ka jing bym ioh wat tang iwei ruh, ha ka national Games ba dang shu dep shen mynta u snem,wat la ka jing mang pisa ka bun bha bad palat 200klur tyngka lah mang da ka sorkar jylla, ha kaba ka sorkar pdeng ka la pyllait haduh 170klur tyngka ka jingiarap pisa sha kane ka Tnat sport and youth affairs jong ka jylla meghalaya na ka bynta ka National Games 2022.

Kat kane ka jingdkoh treikam jong ka tnat, u myntri ba dei peit, u bah Banteidor Lyngdoh, u la ong pynban ba ka jylla ka duna ki jaka ban hikai, ban pyntbit ia ki nongialehkai jong ka jylla shwa ba kin leit ia shim bynta. U myntri u la ong ruh ba kim don kita ki nonghikai kiba la tbit pura, ha ki jingialehkai ba pher ba pher.

Kum ia kane ka jingkren jong u myntri ba dei peit ia ka Tnat sport, lah dei ban pynrem jur, ha kaba u bah Bansharailang, u la ong “Ka long kaei kaei kaba sngewdiaw ban tip ba 200klur lah dep ban ai ia ka bhah kyrpang sha kane ka Tnat, ban pynbha bad pynjanai ia ki jingdonkam baroh na ka bynta ki nongialehkai sport ha ka jylla, hynrei kaba sngewsih ka long ki dang sah hajuh khlem ka jingkylla, wat la ka pisa ka ba bun ba ka Tnat ka la dep pynlut”.

Haba kren ia ka jinglong jingman jong ki nongialehkai, u bah Pyngrope u la ong “Ngi donkam ban ai ia ki nongialehkai sport jong ngi,ia ki jaka kilan met ba biang bad paka bha bad ki dawai, ki jingbam ban pynkhlain bad aibor ia ka met ka phad jongki, katba ka sorkar jongngi kam lah ban buh wat tang u wei u nonghikai ba biang ia ki samla jong ngi”.
Hadien jong ka National Games 2022, ka sorkar MDA ka dei ban ai jubab shaei la buh ia ka 200klur, ban pynbha bad pynjanai ia ka sports ha ka jylla. Kane ka dei sa kawei pat ka jingpyndonkam bakla ia ka pisa jong ka jylla.