28tarik, yn iaid paidbah ka FKJGP, ba sah thylli 3000 tylli ki kam

Shillong:Ka Federation of Khasi Jaiñtia & Garo People (FKJGP) ka la dawa ïa ka Sor kar Jylla ban wanrah noh ïa ka State Employment Policy (SEP), bad ka jingkhuid ha ka jingthungkam thungjam hapoh ka Jylla.
Kine ki dei ki artylli ki mat jingdawa jong ka FKJGP ki ban sa pynshai paidbah ha ka rally ban ïaid paid bah ha Nongbah Shil long, ka ban long ha ka 28 tarik Risaw.

Kane ka rally kan sdang naduh ka por 11 baje mynstep na Motphran bad yn pynkut da ka jingïalang paidbah ha Madan Ïewrynghep, (Fire Brigade).
Kiwei pat ki mat jingdawa kiba ka FKJGP kan buh hakhmat ka Sorkar ka long ban thungkam noh mardor ban pyndap ïa ki kam kiba sah thylli kumba 3000 tylli tam kumba la pyntip da u Myntri Rangbah ka Jylla ha Ïing Dorbar Thaw Aiñ dang shen.

Ka FKJGP kan dawa ruh ban hukum ïa ka Meghalaya Public Service Commission (MPSC) bad ki District Selection Committee (DSC) ba kin pynsted ha ka thungkam thungjam ha ki Tnat bapher bapher jong ka Sorkar.
Halor ka State Employment Policy, ka FKJGP ka kwah ba kane ka policy kan treikam salonsar la ka long ha ki Tnat ka Sorkar Jylla, ki Tnad ka Sorkar Kmie kiba don ha Jylla, ki Private Corporation/ Private Company/ Private Bank da kaba ailad shwa ïa ki samla trai ri trai muluk.

Nalor kine, ka FKJGP ka la pynlong ïa kane ka rally ban dawa plie lad plie lynti ïa ki samla trai ri trai muluk lyngba ki Skill Development Training Programme & Job Oriented Training Programme wat ha ki jaka pule bapher bapher.
Ka FKJGP kan dawa ruh ban pynkylla ïa ki Youth Hostel kum ki Youth Recreation Centre/Career Guidance Centre bad ban thaw ïa ki Meghalaya State Youth Commission khnang ba ki khun samla kiba kylla langkñia kin ïohlad ban ujor ban ïoh ïa ka jingbishar kaba hok ha ki bynta bapher bapher.
Kawei pat ka mat jingdawa ka long halor ka jingthaw lad thaw lynti ïa ki samla ba kwah seng kam lajong.
Halor kine ki mat, ka seng ka kyntu ïa ki samla pule, ki khun samla, ki kmie ki kpa, ki Dorbar Shnong bad ki seng Treimon Sngewbha (Seng Samla, Seng Longkmie, Sports Club, Association bapher bapher) bad ïa baroh ki paidbah nongshong shnong jong ka Bri u Hynñiewtrep ban ai ka jingkyrshan kaba pura da kaba ïa mih paidbah ha katei ka sngi.