Nang jur, ka jing jlep politiks ha kine ki sngi

Ka elekshon MLA, ka la poi noh artad, sa tang saw bnai thik, hynrei kane ka dei ka elekshon, kaba dait thah tasam, ha kaba ym don mano mano ruh, ba bang ban ia kren, ia katei ka sobjek haduh ha kine ki sngi bad kaba kham lyngngoh, ka long ba ki don kito kiba la sdang ioh mithai na ki MLA lane na ki kandidet, hynrei, ka jingeh, ka long ba kitei ruh, ki shu leit shim, kumba shim bainong bad ki sngap noh man man halade.

Kumta ka wan ka jingkylli, la ka dei ka jingduk ne ka dei ka jingjlep jong ki riew paidbah, ia ka sain hima sima ha kine ki sngi?
Halor kane mat, ngi dei ban sngew duhnong shi katdei, ba ngi la duh ia U bah HS Lyngdoh, Bah HS Shylla (na kito kiba dang shu khlad shen), kiba u thylliej jongki, u tied kum u pyrthat, halor ka eh ka shon jong u paidlang ka Ri; katba mynta pat, kiba dang don, ki kylla tang ki nongleh komik bad ki nongak biria bad ki bym nud ban kren ia ki jingeh u paidbah.

Haba shu peit bha, la iohi ruh, ba kiba bun pleng, imat, ki la ngiah ia ka politiks bad ka daw ka long, ba haba don ka jing iakob khwai dohkha, ki mih ki buskit, kiba da ki phew lak tam ne duna bad kam mut ba u trai pung, u theh pisa bad sam buskit nalade, khlem da ioh kamai eiei ruh em bad la iohi shuh, ba ki kali da ki hajar tylli, ki ieng hajan jong ki pung iakob khwai bad katei ka pyni, ba ki don da ki hajar ngut, kiba leit shim bynta sha kitei ki tamasa.

Kam dei tang kata, haba peit sha Jaintia ruh, la iohi, ba ha man ki madan, ki don da ki hajar ngut, kiba ia risa, ia kynhoi bad ia kyrkait bad ia bret pisa ban iakob ia tur masi bad kumta, ka pyni shai ba ki briew ha kine ki sngi, ki bang bad pynleit jingmut ia ka iakob khwai dohkha, ia kob ia tur masi, katba kim bang satia ia ka politiks bad lada ka long kumta, ka kdew, ia ki dak ki shin, ki bym bha satia ia ka lashai jong ka sain pyrthei.

Kane ka la dep jia ha ki shnong bapher, ha ka ba ki briew kiba donburom, ki la ngiah ia ki kam shnong kam thaw bad nangne shakhmat, kin sa mih sa ki nong mane ksuid mane khrei, ki nongleh komik, ki nongshad komik bad ki nongpynbiej briew, ki ban long ki nongmihkhmat, kum ki MDC/MLA bad ki MP ruh bad kane kan plie lad ia ki kam tuh ba shyrkhei, ki kam kamai shi iing bad ki dak jong ka jingsahdien, ki ban sa jia ha ka jylla hi baroh kawei.