Balei hiar dor ka jaitbynriew jongngi?

Babu Kular Khongjirem

Katba nang mih bad nangiaid ki sngi ki por,katta ruh,ka jaitbynriew Khasi-Jaintia jongngi ka la nanghiar bad nangtyllun arsut pynban khlem i don jingkyrmen shuh ba kan lah ban khie khlieh biang wat lada nang bun kiba la nang la stad mynta.U myllung Soso Tham u la pashat lai tylli ki daw ia ka jingtroin noh ka jaitbynriew jongngi. Ka daw bah kaba nyngkong eh ka dei ka jingleh bym salia shuh jongngi ia ka Thymmei bad ka nongrim jong baroh bad kata kadei ‘ka Hok bad ka Jingshisha.’Ngi im ha kane ka juk kaba la shu lyndet lut bad khlem salia shuh ia ka Hok bad ka Jingshisha baroh.

Ka Hok bad ka jingshisha,ha ka jingshisha, ki dei ka blei.Khlem ka Hok bad jingshisha,kata ka mut, ba ngi im hangne ha pyrthei khlem ki blei.Ka jaitbynriew kaba im khlem ka Hok,ka mut, kata ka jaitbynriew ka dei kaba shu im khlem ki blei.Kum kata ka jaitbynriew kan long ka jaitbynriew kaba shu im lyngkar,kaba laitlan bad kaban sa ngam noh ha ki pateng ban wan. Kaba ar pat kadei ka jingbym salia ne niewbein ia la ka jong ka Thymmei ba la buh beit buh ryntih da ki longshwa manshwa jongngi.

Ym don ba kwah shuh ban bud ne leh ia la ka jong ka Niam ka rukom,ka riti ka dustur bad ka lariti lajong.Khlem ka Niam ka rukom bad ka riti ka dustur ka jaitbynriew kalong lypa kaba iap.Ki ong,shisien ba la iap ka niam ka rukom bad ka riti ka dustur,kata ka jaitbynriew ruh ka la kylla long ka jaitbynriew kaba iap.Ki jaitbynriew Isreal ki neh ki khlain haduh mynta mynne ba ki khlain bad satar ban bat bha rdin ia la ka niam ka rukom bad ka riti ka dustur u longshwa u manshwa kat haduh ba kiwei ki jaitbynriew ki phaikhmat lut pynban sha ki.Ka jingkhein bein,niewbein bad ibein ki Khasi ia la ka thymmei lajong ka la pyntwa ia ki mawkynroh bad pynshong kynrong lut ia ki nongrim u Khasi nadong shadong haduh ba shitom ban khyllie biang ia ka Nam ka kyrteng, ka burom ka ijot jong ka jaitbynriew jongngi. Kaba khadduh eh kadei ka jingtynneng palat pud ia ka jong kiwei.

Ka jaitbynriew kaba shu lap miet eh tang ban shu tynneng ia ka jong kiwei kam ju poi shano shano ruh.Ki ong,hana ka jaitbynriew Khasi jongngi kadei kawei na ka jaitbynriew ka ri India kaba kloi eh ban tynneng ia ka jong kiwei bad ban klet noh ia la ka lajong.Ngi la shu ia tynneng ia ka jong kiwei la kum ki ‘lang matlah khlem tip shaei kan poi ka jaitbynriew lajong. Kine kiei kiei baroh ki la pynlong mynder iangi ha la ka jong ka ri lajong.Ngi sngewlehrain ban leh ia la ka lajong bad ngi sngewsarong pat lada ngi iohlad ban tynneng ia ka jong kiwei pat.Ngi sngewtynnad ban bein ia la ka lajong bad pynkiew skong pat ia ka jong kiwei.Kaba leh mangi ki Khasi kaba lait bad kaba bakla suda,ka jong kiwei te kaba biang lut.Lada ngim lah ban pynbeit ia kane,ngin iai long ka jaitbynriew kaba shu shong kynrong sah baroh shi rta syndon.