Nang bun shah, kiba im khlem bam ha India

Ka jingshah thngan jong ki briew ha India, ka la nang jur ha kine ki sngi haba ia nujor, ha ka pyrthei hi baroh kawei bad mynta ka India, ka hap sha ka kyrdan kaba 107, na ka jingdon ki Ri, kiba 121 tylli ha ka pyrthei shi tyllup bad ha u snem 2021, ka India, ka hap ha ka kyrdan ba 101 na ki 116 tylli ki Ri.

Kaba pynlyngngoh, ka long ba ka Pakistan, ka don ha ka kyrdan kaba 99, ka Bangladesh, ha ka kyrdan kaba 84, ka Nepal, ha ka kyrdan kaba 81, ka Sri Lanka, ha ka kyrdan kaba 64 bad kaba kham sniew ia ka India, ka dei tang ka Afghanistan, kaba hap ha ka kyrdan kaba 109.

Ka Global Hunger Index, lane ka jingkhein, halor ka jingdon ki briew kiba khlem bam lane kiba bam duna, ka dei ka kaiphod, kaba la pynmih da ka Concern Worldwide and Welt Hunger Hilfe, kaba dei ka seng, kaba na Ireland bad na Germany.

Haba ngam jylliew ia katei ka kaiphod, kin don shibun bah, ki ban mynjur ia kane ka jingtohkit, namar ba ka nuksa kaba nyngkong eh, ka long halor ka jingrem jong ka doh masi, doh sniang bad kiwei ki mar bam ha ka jylla, ha kine ki sngi bad ka nuksa, kaba nyngkong eh, ka long ba kiba bun kim ioh shuh ban bam doh ha kine ki sngi, hynrei, ki hap ban shaniah, ha ka bam ktung bad ka bam ja jhur, ka bym tei satia ia ka met jong u briew.

Sa kawei ka daw bah, kaba ki briew ki shah thngan lane ki bam tang ban kdang, ka long halor ka jingleh kput ka sorkar India, da kaba shim khajna ia ki jingbam bapher, ha kaba ia u khaw, la oh da ka khajna, kaba 5 percent, nangta sa 5 percent, ka khajna ia kiba bam puri bad 18 percent, ka khajna ia kiba bam puratha bad sa bun bah ki mar bam kiba kongsan, kum ki jingbam dihsha, kiba la dain da ka khajna kaba heh, ha ka kyrteng ka GST.

Lyngba kane ka kaiphod, ka la dei ia ka sorkar India, ba kan peit biang ia ka rukom ai bam ia u paidlang ka Ri bad ka jingai ei ne ai tad dor, ia u khaw kam don jingmut eiei ruh em, lada jia ba ki briew, kim ioh pisa, wat tang ban thied ia u buiam shet jingshet bad ka dei ruh ba ngin sngewthuh ba ka bam ja jhur, ka dei kaba remdor shibun, namar ba ia u jhur, ym don ba bam im ne bam thang, katba kiba bam doh, ki lah ban shet syrwa, bam thang bad katei ka dei ka jingbam kaba tei ia ka met.