KA NONGKYNTI I MEI

S.K.N

[ba bteng] Hadien ba la dep bam dep dih bad la khreh nadong sha dong, ki sa ia mih na iing ban leit kai noh sha um ha ka por khatwei shiteng ei ei. Lynter lynti ki dap da ka biria ka rkhie ka kmen tad haduh ban da poi ha um. Marsien poi hi ki la sdang ka khura maw khura dieng ha um. Ka Lydia kaba phong da ka skad ka la hap ban rah kham shajrong la ka sopti. U Hep uba nang bud nadien nadien jong ka u la peit jawdud ia ki khohwah ba lieh shoit shoit ka Lydia. Ka khmat jong u ka la neh bad kmen ban iohi kumta. Ha la dohnud marwei marwei u la puson
“Ani ka bhabriew shisha”.
Baroh shi sngi u la phohsniew marwei marwei sha kawei pat ka pyrthei. Ka dur ba bhabriew ka Lydia bad ki ktien ba jem bad don burom jong ka ki la tuh lut ia ka dohnud u Hep baroh. Marwei u la kut jingmut ba u dei ban ioh ia ka ha ka jingim jong u, ban long ka baieid eh jong ka mynsiem jong u.

Shisha ha kata ka sngi ki la ioh shibun ka tham, bad ruh ki doh rit doh rain, nalor ka shymprong. Ki mih na um da ka jingkmen ba ki la ioh rah shibun ki doh sha iing.
Kumta haduh janmiet ynda la wanphai na um, u dang shongkai slem biang ha iing ka Lydia.
Ka Kmie jong ka Lydia ka la bthah ha la ka khun ban pynshet ja lang bad u Hep. Kumta ruh ka Lydia da ka jingkmen ka la pynkhreh wut wut. Katba u Hep u dang byrngia ka shongkai bad u kpa jong ka kumjuh ruh bad ka kmie jong ka, ka Lydia pat ka la da dep ih bad ja bad jyntah. Ka la pynsdieh ruh ia ka tham bad kita ki dohkha rit ba ki wan tong na wah. Hadien ba la dep ih lut kiei kiei, ka Lydia ka peit ia ka por bad ka pyntip.

“Ale noh ngin ia bamja mynta la hynniew baje. Ale noh nga la dep shet lut .”
“Em nga ruh ngan leit noh ho, phi nang ia shongkai, ha iing ki la lyngngoh katta ruh ngam pat poi iing..” La ong u Hep
“Wa haba kito baroh kiba ngi wan tong mynne nga la shet lut khnang ba phin ia bamja lang.. Kumno Hep phi mut ban leit.. ” la phai ktien ka Lydia
“Ngam pat sngew thngan te, dang shu dep dihsha kumto…” La phai ktien biang u Hep
“Em bam beit nga tip ba ynda phin bam namar nga shet baduk ma nga phin sa bang bha, ne phim treh bam ne namar ngi te ym ioh ka bang ka thiang?” La ong pat ka Lydia
“Wat ong phi kumta, ngi ruh kumjuh hi… Sngew lehrain pynban..” La phai ktien u Hep
“To Hep ale, ngin leit bam la ka bam ynda la dep sa leit noh ym lei lei lada phi kyrkieh” la ong u Kpa ka Lydia
Kumta u Hep haba ki la ia pynbor eh u pynkohnguh noh ia lade. Katba ki dang ia bam, u Hep u la sngewthuh shisha ia ka jingmad jong ka jingbam. Artat u kwah ban pynkmen ia ka Lydia kaba u la shoh bad sngew ieid eh, kumta u bam arsien kumba dei hi ban bam.

“Ka jingbang shisha phi nang bha Lydia ban shet. Kam dei shuh ka shet nongkyndong hynrei ka dei ka shet nongsor” la ong u Hep
“Nga lah ong ia phi ba phin bang namar ngi shet nongkyndong, ym kum phi ba shet musla musli” la phai ktien ka Lydia bad ka rkhie artat.
Hadien ba la dep bam dep dih, ka Lydia ka pynsong sa u kwai bad ki sdang ban ia shongkai biang shiphang, tad haduh ba ka por ka la poi phra baje, u Hep u sa mih nangta.
Lynter lynti, u sngew kmen shibun eh ban ioh ia kaba kum kata ka sngi kaba pynsah kynmaw ia u ha ka jingim. Katba dang iaid, u kynud sur jingieid artat haduh ban da poi ha iing.
“Ade khun phi wan nangno kein naduh mynstep haduh katta ?” La buh jingkylli ka Kmie (Kong Lumspah)
“Tip ngi ia wan tong doh bad ki jong i Maheh bad i Kmie ka Lydia haduh katta, namar kim shah ban mih khlem bamja” la jubab u Hep
“Ei kpa ale kren hi phi ia u Hep, imat lah shoh jingieid ne u khun” la khot ka kmie
Haba u kpa (Bah Shanbor) u wan mih hangta, u shu ong
“Ynnai jan than me khun, sa da iathuh lada me lah don jingiadei ..”
U Hep u shu sngap jak shiphang bad ynda la ban ktien biang u Kpa, kumta u Hep ruh u phai ktien
“To Pa…” u leit rung noh sha kamra sum. [yn dang bteng]