Khang dam sah, ia ki iew ki hat khappud

Ka jingkhang dam sah, ia ki iew ki hat khappud, ka la buh ia ki nongshong shnong sha ka thain, ha ka kordit kaba jur shi katdei, ha ka kamai jakpoh jongki, hynrei katei ka buh ruh ia kiba bun, ha ka jinglyngngoh, halor ka daw jong ka jingkhang sah ia kitei ki iew khappud, khamtam ha East Khasi hills District.

Kitei ki iew khappud, kiba don ha kjat jong ka Shella bad khambun ha Pynursla Constituency, ki la khang mynta la ar snem tam, halor ka jingteh kyndon 144 Cr PC jong ka District East Khasi hills, namar ka khlam covid; katba kaba pynlyngngoh, ka long ba sha kiwei ki jaka, la weng lut, ia baroh ki jingteh kyndon, katba sha kitei ki iew khappud, ka jingkhang ia ki iew ki hat, ka dang iai bteng bad la iohi, kumba ki la pynjari skhem ki shipai BSF, ban pynduh noh syndon ia kitei ki iew kiba ia die ia ki mar pyut mar ksain bad ki khar Bangladesh.

Lada kane ka jia shisha, ka pyni, ba ka sorkar jylla, ka la shim sting shaba palat liam, ia katei ka kam, ha kaba ka la aimon ia ki BSF, ba kin tuklar marwei ia ki jaka khappud bad ka dei na kane ka daw, ba ki shipai khappud, ki la ieh shrah ia ki jaka puta, kiba don sha shiliang u sainar, katba ki la nang sdang ban kurup ia ki shnong ki thaw bad ban pyrkhing ia ka iaid ka ieng bad ka leit ka wan jong ki riew paidbah lane kaba pyni, ba kitei ki jaka puta, kin hap ha ka jingteh kyndon jong ki bor shipai, ym shuh ha ki trai jaka.

Ym tang katta, lada kane ka jingkhang dam, kan bteng ha kane ka dur, ka pyni ba ki BSF lane ka sorkar Jylla, ki la pynkhein pynban, ia ka jing ia mynjur, kaba iaid na ka por sha ka por, hapdeng ka sorkar India bad ka sorkar Bangladesh, ban nang pynheh ia ki iew ki hat bad ka khaii pateng, hapdeng jong ki ar tylli ki Ri.

Haba shu peit khai, la iohi, kumba ka jingtrei kam ha ki khappud, ka don ka jing iapher shibun hapdeng ka Meghalaya bad ka Tripura bad nangta ka Manipur, lane ka Mizoram, kiba hap ha ki jaka khappud bad ka Bangladesh, Myanmar nalor kiwei pat bad la iohi bha, ba ka Tripura, ka iai plie ia ki iew khappud bad ka khaii pateng bad ka Dhaka bad ka pyn donkam ruh ia ki um, ki wah jongka, ban shalan ia ki mar ki mata jongka, katba ha kane ka jylla, kiba kum kitei ki lad ki lynti, kim shym la don satia.