Ka sorkar, ka dang ap kaiphod, halor ka jingsiat lyer sat khmat, ong u myntri

Shillong:U Myntri ba dei peit ia ka tnad korbar ri ha ka Sorkar Jylla, u bah Lahkmen Rymbui u la ong ba ka tnad kan ym lah ban shu shim kano kano ka sienjam, ban pynshitom iano iano ruh, tangba la don ka jing kynnoh, hynrei kan hap ban ïaid kat kum ki ain.

Haba kren bad ki lad pathai khubor, na ka liang u Myntri ka tnad korbar ri u bah Rymbui u la ong “Halor ka jingshah kawang lyer pynsat khmat (Teargas) ia ki nonghikai, naduh ka sngi thohdieng ladep ban ong ba ka tnad ka dang ap ia ka kaiphot na ki bor District administration”.

“Ka kaiphot kam pat poi sha nga bad ynda kane ka kaiphot ka la poi, ngin sa shim ia ka sienjam kaba donkam halor kane ka bynta”u la bynrap.

U Myntri u la kren shai ruh “Kaei ka sienjam kaba kum ka tnad kan shim kan long kat kum ka ain bad ngi khlem don hangne ban iarap iano iano ruh bad ki briew kiba donkti ban pynkhein ia ka ain ka tnad kan ym pyllait, hynrei shwa ban shim kano kano ka sienjam ngin hap wad ka jingshisha”.

Lah ban kdew hangne, ba na ka liang ka Hynniewtrep Integrated Territorial Organisation (HITO), mynta ka sngi ka la pyntip paidbah ban pynlong da ka jingiaid paidbah, ban leit buh syntiew ha ki katto katne ki jaka kum ka dak ban pynpaw ia ka jingpyrshah halor ka jingslem ka tnad ban weng kam shipor ia ki pulit kiba donkti ban kawang lyer pynsat khmat (teargas) ia ki nonghikai.