Haba u bar shnong, u lah, u trai shnong pat, balei um lah?

Ka jingud jong ki nong Khadar Shnong, ka long kaba sngew sangsot, namar ba ki shnong, kiba don ha syndah jong ka shnong kaba pawnam tam jong ka Ri Khasi, hynrei, kat haduh ha kine ki sngi, kim pat ioh surok kali satia.

Katei ka jingjia, ka la dei ka jingleh sting jong ki nong mihkhmat jong katei ka thain, ha kaba ha ka rta kaba 50 snem jong ka jingioh jylla bad 75snem jong ka jinglaitluid, kim shym la lah ban ai tang ia ki jing donkam, kiba kongsan jong ki nongshong shnong.

Halor kane ka mat, ngi dei ruh ban kynmaw, ba ka jylla Meghalaya, ka dang dei ka jylla, kaba rit than, haba ia nujor bad kiwei ki jylla jong ka India bad ka jingheh jongka, kan ia ryngkat bad kawei ka District ha Uttar Pradesh bad Madhya Pradesh; hynrei ka jingkylli, ka long, ba balei ki paidbah, kim ioh ia ki jingdonkam ba kongsan jongki, haba ka sorkar India, ka theh pisa puk puk sha ka jylla, halor ki kam pynroi bapher.

Hynrei, ka mat kaba donkam bha ban iakren hangne, ka long shuh shuh, ba balei ia kaba U MLA, lane U MP trai shnong, um lah, ba ynda wan pat u MP bar shnong, ba u lah ban pynbiang surok, ban pynbiang ia ki jaka sumar bad kiwei bad kane lehse, ka dei na ka jingshah khanglad ne leh politics ka sorkar jylla, namar ba U MLA, uba mynta, u dei na ka seng rit PDF bad kham mynshwa, u dei na ka seng UDP?

Lane lehse, ka pyni pynban, kumba ki MLA jong ka thain, ki shu shaniah ba kan sam mitmit ka sorkar jylla bad ba kim nud ban leit tied jingkhang sha ka sorkar India lane ba ka sorkar jylla, ka leh politics ia ki MLA trai shnong, katba ka pyndem niuhmat, ynda ki wan ki briew kiba nabar?

Khlem da niew tang eh bin pa bin, ngi iohi, ba ka jingsam ia ki skhim shna surok, ka la pheil jubor justi ha kane ka sorkar kaba mynta bad ka daw ka long, ba ki pynhap lang ha kawei ka thup ia baroh ki skhim kiba wan na ka sorkar India; nangta, sa kiwei pat, kiba ki shu shim da ka ram bad ki ban buh jingeh pynban ia ki paidbah, ha ki sngi ban sa wan ba kin siew ia katei ka ram, lyngba ki khyrdop lum pisa bad nangta, sa ka jingsam shiliang ia ki skhim surok, ha kaba ki don kiba ioh surok, wat ha ki lynti shnong ruh, katba ki don sa kiwei pat, ki shnong bah bad kiba don ka rep ka riang kyrhai, hynrei, ki shah khanglad ha ka leit ka wan, ka iaid ka ieng bad ka kit ka bah.