Ka jingrai kawei ka longing kam dei ka rai u paidbah

Pastor Shanlang Warjri

Ka Mairang Constituency ka dei ka Concstituency kaba ju sei ia ki riewkhraw kum U Tirot Sing, Ka Phan Nonglait bad kiwei kiwei ki Riewkhraw ha kiba bun ki kam khamtam ban kyntiew ia ka Jaidbynriew hynrei sngewsih ban iohi ha kine ki khyndiat snem kiba la leit noh ka la hiar arsut ha ki liang baroh namar ka jingbymioh shuh ia ki Nongialam ki ba shisha. Ka jingbym ioh ia ki Nongialam ba shisha ka pynlong ia ki nongshong shnong jong ka Constituency ban mad shibun ki jingeh, dei halor kane ka nongrim kaba la pynlong ia nga u briew ba don jingkitkhlieh ban mih shakhmat ban iakhun ia ka MLA Election 2023 da ka mynsiem kaba rangbah khlem da ka jingpynbor mano mano.

Ka jingmih jong nga ban iakhun ia ka election ka long ban saindur thymmai ia Synshar khadar, ban ai ka jingshakri kaba hok, ban long ka Sur na ka bynta ki rangli ki juki, ban long ka jingkyrmen ia kiba la duh jingkyrmen, ban iakhun pyrshah ia ka jingnion bein ia ki ba duk ba kyrduh, bad iakhun pyrshah ia ka jingpynlong kam khaii ia ka synshar ka khadar, ban iakhun ia ka bamsap bampong bad kumjuh ruh ban iakhun pyrshah ia ka Dynasty Politic lane ka jingbat ia ka lakam synshar khadar tang da kawei ka longing.

Ka jingailad ban bat ia ka kam synshar khadar tang da kawei ka long longing (Dynasty Politic) kan buh ka jingma bad jingmynsaw ia ka Constituency bad ia ka Jylla hi baroh kawei. Kum ki Paidbah ngim dei ban klet ba ka rai jong kawei ka longing (Dynasty Politic) bad katto katne ki riewkhwan myntoi shimet kam dei ka rai jong U Paidbah. Kum ki Nongshong shnong ngi dei ban tip ba ngim lah ban ioh ia U Nongialam ba shisha lada jied nongmihkhmat da kaba pynshongdor da ka bor ka Pisa hynrei dei tang lada ngi jied da ka lynti ka Hok bad Jingshisha. Ka jingstad bad ka jingshemphang ki nongthep vote ka Jylla kan wanrah ia ka Synshar ka khadar kaba khuid ba suba, ka lawei ki khun ki kti jong phi.