Pynliem ka RBU ia ka USA, haba sdang ka phutbol ka NSA ha Pahamsyiem

Nongpoh: Ka Ri Bhoi United, ka la ioh ban khur ia ka namjop kaba nyngkong haba sdang ka lympung ialehkai phutbol ia kaba la pynlong da ka Nongpoh Sports ha Madan Pahamsyiem, kata hadien ba ka la lah ban pynliem noh pyrshah ia ka Umden Sports Association da 5-4.

Ka jingiakhun ha katei ka sngi, ka long ba ha baroh ki ar kylla jong ka jingiakhun, ki la kut noh ha ka jingiakhaid khlem don kiba pynkhih jar, hynrei haba la poi sha ka Tie Breaker, ka Ri Bhoi United ka la lah ban pynliem noh ia ka Umden Sports Association. Ia katei ka lympung ialehkai, la wan ban plie pyrda da u Bah Bobby Nongbet, District Sports Officer ka Ri Bhoi, ha ryngkat ka jingdon u Bah Bipul Thangkhiew, President ka RBYF, u Bah Lambok Rymbai, President ka Nongpoh Sports Association, u Bah Marcus Marten lem bad shibun kiwei.

Kum ban shu kdew hangne, ba ka NSA ka la pynbna ia ka khusnam da ka song pisa kaba T. 1 lakh ia ka kynhun kaba rah ia ka namlahduh bad T. 50 hajar ia kaba wan ha ka kyrdan ba-ar.