Nongpoh: Ka Sunfeast Cup 2022 Meghalaya Master, kaba la pynlong da ka Lynti Jam Welfare Development Association ha Madan Jyntru, la pynkut noh hynnin ka sngi Saitjain bad ha katei ka sngi, ki la don lai tylli ki kynhun ialehkai, kiba la ioh ban khur ia ka namlahduh bad ki ban sa ioh ia ka lad ban leit mihkhmat na ka jylla ha ka Northeast Sunfeast Cup 2022 ka ban sa long ha Nongbah Guwahati.
Lah ruh ban kdew hangne, Sunfeast Cup 2022, kaba la pynlong da ka LJWDA, ka la pynlong ia katei ka lympung ialehkai ha ryngkat ka jingiatreilang bad ka SPT Sports Bangalore, ha kaba kino kino ki khynnah kiba lah ban ialehkai bha, kin sa shah jied ha katei ka SPT Sports na Bangalore. Ki kynhun kiba la iohrah ia ka namladuh, ki kynthup ia ka kynhun ialehkai kaba la tip kum ka PFR, kaba la long kum ka lahduh ha ka U-16 ha ki kynthei, ha ki Shynrang la rah da ka Umsning Proper-A bad ha ka U-13 la rah da ka Shangbangla SC.
Ka PFR kaba la rah ia ka namlahduh ha ki kynthei, ka dei hadien ba ka la lah ban pynliem noh pyrshah ia ka LJWDA da 1-0. Katba ha ka U-16 ki shynrang, ka jingiakhun ka la long hapdeng Umsning Proper-A pyrshah ïa ka Brothers, kiba la pynkut ia ka jingiakhun ha madan da 2-2, hynrei haba la rah sha ka Tie Breaker, ka Umsning Proper-A, ka la pynliem noh ïa ka Brothers United da 4-2. Hynrei ha ka jingiakhun ki khynnah U-13, ka Shangbangla SC ka la pynliem noh ia ka Eleven Brothers 1-0.
Ki riew rangbah kiba la sakhi ha katei ka sngi ba la pynkut noh ia katei ka lympung ialehkai, ki kynthup ia u Bah Primson Makdoh, u kyrtong ka HSPDP na Umsning Constituency, nangta u Bah Aibor Khongjee, Rangialehkai pawnam ka jylla, u Bah M Tongper ADC ka Ri Bhoi, u Bah Sumar Swer President ka LJWDA lem bad kiwei.
Phi don ban ong eiei?