Kwah ki nongshong shnong ka Baikam, ban wan sha Meghalaya

Shillong:Ka seng Hynniewtrep youth Council (HYC), mynhynnin ka sngi, ki la wan ban synran lang ia ki nongshong shnong jongka shnong Baikam ban wan iakynduh ia u myntri kam poh iing, u bah Lahkmen Rym bui ban dawa na ka bynta ban kynthup lang ia ka shnong Baikam hapoh ka jaka jongka jylla Meghalaya.

Ha ka jing iakren bad ki lad pathai khubor, ka kong Rimon Suchiang, ka la ong ba ki don haduh 37 tylli ki iing ha Baikam bad ki nongshong shnong ha katei ka jaka kim tip ia kata ka jingia pynbeit pud jong ka Meghalaya bad ka Assam, hynrei dei tad ha ka por ba la soi ia ka MOU, ki sa ioh jingtip.

Shuh shuh ka la ong “Kum ki khasi pnar, ngi kwah ban don lang bad ka jylla lajong, namar ban im ha ki jaka nongwei, namar ba ki sngew nongwei palat. Ha ka shnong ka thaw jong ngi ki ia dei khasi lut bad kane ka dei ka lad kaba kongsan tam iangi ba lada dang don ka lad ngi kwah ban don ha ka jylla Meghalaya, namar ka niam ka rukom, kren ka khana, ka riam ka beit bad ka iaid ka ïeng ka dei kajuh kumta ban im shari nongwei ka long shisha ka jingeh”.

Ha katei ka jaka kiba bun ki dei ki nongrep bad ka jingioh jingmyntoi na ka jylla Meghalaya bad na Assam ruh kim ioh eiei.Ka kong Rimon suchiang ka la kyrpad ia ka sorkar ba kan sngewbha ban kdup ia ki sha Meghalaya, khnang ba kin ioh ban imsuk imsaiñ, ka la bynrap.
Na ka liang jong u bah Lahkmen Rymbui ula kular ba un sa shimkhia ia kane ka kam bad un leh katba lah ban iarap ba kumno kane ka shnong Baikam kaba shong da kine ki khasi pnar ba kin ioh bad hap hapoh ka Meghalaya.

Na ka liang jong ka seng Hynniewtrep Youth Council, kan nang iai buddien ia kane bad kin sa buh jingthoh ha u Chief Minister bad kumjuh ha u Deputy Chief Minister, ba namar ba kine ki nong shong shnong ka Baikam, ki kwah ban don hapoh ka Meghalaya bad ba ki dei ban kdup ia kim ba kin wan sha Meghalayam namar kam dei kaba suk ba kin don bad shong bad ka jylla Assam, namar ka jingiapher ha baroh ki liang naduh ka bam ka dih, ka ktien ka thylliej ka iapher bad ka riti ka dustur ka iapher.