Lyngngoh U bah Paul, ia ka jingkren u heh RSS, ha shwa ka elekshon

Shillong:U Working President ka United Democratic Party (UDP), u Bah Paul Lyngdoh, u la ong ba ka jaid bynriew Khasi-Jaintia ka dei ka jaidbynriew kaba la rim duh, bad shwa ban don ha ka ri India, la tip shwa ia ki nongshong shnong jong kane ka Jylla kum ki jaidbynriew tynrai, jaidbynriew Hynniewtrep Hynniawwasa.

U Bah Paul u la ong ia kane, haba pynphai ktien halor ka jingkren jong u khlieh duh ka Rashtriya Swayamsevak Sangh (RSS), u Mohan Bhagawat uba la ong ba baroh ki nongshong shnong ka ri India, ki la dei lypa ki Hindu.

U la ong ba na kano ka bynta ne naei, la khmih ban ong ba u Khasi u la dei lypa u Hindu, ia kata hap ban kylli na u nongkren, namar ka jingshisha, katkum ka history ka dei ba ka jaidbynriew Khasi-Jaintia, ka dei ka jaidbynriew kaba la rim bha.

Lah ban pynpaw ba u khlieduh ka Rashtriya Swayamsevak Sangh (RSS), u Mohan Bhagwat, ha ka jingialang kaba la long ha ka sngi u Blei ha Shillong, u la ong ba ka RSS kam dei ka seng ban pynkylla ia ka niam, namar baroh ki la dei lypa ki Hindu bad ka jingmut hindu kam dei ka niam, ka dei ka rukom im.
Ha kawei ka liang u Bah Paul, u la ong ba um lah ban batai kaei ka daw kaba pynlong ia u nongialam jong ka RSS ban kren ia kitei ki kyntien, khamtam ba ka Jylla ka sah sa tang saw bnai ban leit sha ka election MLA.