Ki khun sniang, ki iap, ba ki la shong kali bun sngi, iathuh U MR

Shillong:U Myntri Rangbah ka jylla u Conrad K Sangma, u la ong ba ki khun sniang kiba la iap ha kine ki sngi, kim dei kiba la iap, namar ba ki don ka jingpang, hynrei dei na ka daw ba la wanrah ia ki bun bun sngi da ka kali.

Lah ban kdew hangne ba don na ki khun sniang, kiba la sam da ka sorkar MDA lyngba ka skim Rural Backyard Piggery, ki la iap noh tang katto katne sngi, hadien ba la sam sha ki nongioh jingmyntoi.
Haba kylli u Myntri rangbah u la ong “Kam dei ba kine ki khun sniang ki don jing pang, hynrei ka jingiap jong ki, ka dei na ka daw ba kine ki khun sniang ki hap shong ha ki kali ar lai sngi haba wanrah ia ki, na kiwei ki jylla”.

“Ka jingwanrah ia ki khun sniang ka long da ki hajar tylli bad ka lah ban don kum kane ka jingjia bad kine ki sniang kiba la iap ki dei na mar ba ki la shong kali da ki bun sngi bad kin ym lah ban kiar na kane, namar ba ym lah ban phikir iwei pa iwei”u la bynrap.

U Myntri rangbah u la ong “Ka don ka jingiap jong ki khunsniang, hynrei kam dei na ka jingioh, pang hynrei dei ba la wanrah ia ki, ha ki kali bad haba don ka kaiphot ba ki khun sniang ki la iap, ngi la kular ia ki nongioh jingmyntoi ba ngin sam biang ia ki da kiwei” .