Pyniap u bar jylla ia ka kynthei, hapdeng surok shnong ha Pahamsyiem

Nongpoh:Kawei ka kynthei kaba dang 19 snem bad kaba la tip kum ka Nisha Nongbet, ka la khlad noh na sla pyrthei, kata hadien ba ka la shah dung da ka Tari ha uwei u briew, uba la tip kum u Bir Bahadur Thapa.

Katei ka jingjia shah dung tari ia katei ka kynthei, ka la jia ha ka por 10 baje eiei mynstep, ha kaba ka la shah dung tari bad khlad syndon, ka dei ha ka por mynsngi mynshai bad kaba dei ruh ka surok shnong kaba bun ki briew kiba iaid ba ieng, namar ka dei ka jaka kaba ha pdeng shnong.

Ka jingtip kaba la iohlum, la ong ba utei u runar tang mar ia dep leh ia katei ka kam pyntriem, u la phet noh na katei ka jaka, ha kaba watla ki la don ki briew shnong, ki la pyrshang beh ia u, hynrei u la lait phet na kti ki paidbah.

Hynrei kham hadien, haba ki paidbah ki la pyntip sha ki Pulit ka Nongpoh bad na ka jingiarap ki paidbah, la ong ba ki Pulit ki la ioh ban kem noh ia utei u runar bad mynta u dang don hapdeng ka jingshah tohkit.
Haba iadei bad ka jingiadei hapdeng utei u briew bad katei ka kynthei, la ong ba ki la don ka jingiadei mynta la kumba 5 bnai eiei, hynrei haba iadei bad katei kaba la jia shah pyniap, ym pat lah ban tip ia ka daw bad ka jingtohkit kan dang iaid shakhmat.