Shah kit ram ka MeECL, haduh T.75klur shibnai, kynnoh U MLA

Shillong:U Zenith Sangma, MLA bad uba dei u nongialam jong ka seng All India Trinamool Congress, u kren sngewkhia jur, halor ka jinglong jingman jong ka tnat bor ding ha ka jylla bad ula pynsngew ba ha ka dorbar mang pisa jong ka jylla, la iathuh ha iing dorbar, ba ka jinglut kaba man u bnai jong katei ka tnat MeECL, ka long T.135klur, katba ka jingioh kamai jong katei ka tnat, ka long tang T.71klur; nangta ha ka dorbar synrai kaba dang shu kut, u myntri bor ding, u iathuh ba ka jinglut kaba shibnai ka long T.150klur, katba ka jing ioh kamai ka long mar shiteng lane T.75klur. U Zenith, kumta u kylli, ba mano ban bei ia katei ka pisa kaba duna, kaba long T.75klur ha ka shibnai lane T.900klur ha ka shisnem.

U Zenith, u ong shuh shuh, ba kine ki briew, kiba don ha ka bor, ki pynlong ia ka MeECL, kum ka masi khem dud, da ka jingmut, ban ioh bam tuh na katei ka tnat sam bor ding.
La ong shuh shuh, ba ka jingiai shim ram, ka dang iai bteng shi bteng bad ka pisa jong u paidbah kaba kot sha ka T.617klur, ka la shu ngam ha kane ka corporation bad mynta kane ka tnat, ka la tlot bor tyngeh bad kam lah shuh ban kyrshan dalade hi.

U Zenith, u kynnoh rub ba kane ka sorkar, ka thied bor ding kaba shongdor haduh T.12 shi unit bad kata ruh, ka dei kaba khlem ka jingioh jingmynjur, na ka tnat MSERC. Ym tang katta, la kynnoh shuh shuh ia ka jingailad ia ka UGO billing, kaba la pyniaid da ka software, ha kaba ia u nongthaw bill, ym shym la pyntip paidbah satia.

Kane ka sorkar MDA jong U Conrad Sangma, ka la bam tuh lut na baroh ki tnat ka sorkar jylla, ha kaba ka BJP, ka UDP bad kiwei ki seng trai ri, ki ia don bynta lang ban nang aibor ia kane ka sorkar, ba kan lute ia ka pisa paidbah bad U Zenith, u dawa namarkata na u myntri rangbah bad na u symbud myntri rangbah, ba kin ai da ka kot lieh, khlem pynslem halor ka jingtrei kam kane ka tnat.