“Pynsangeh ia ka ktem khalai” phah jingthoh u MLA NPP sha u myntri rangbah

Nongpoh:Haba kyrshan ia ka jingsngew ki paidbah, kiba la pynpaw ia ka jingpyrshah kaba jur halor ka jingthmu ka sorkar ban wanrah ia ki Casino ne ki ktem ‘Khalai’ ha Ri Bhoi, u Bah Bah Sosthenes Sohtun, MLA Jirang, u la phah jingthoh sha u Conrad K. Sangma, Myntri Rangbah ka sorkar jylla, na ka bynta ban kyntu ia u ba u dei ban pynduh pyndam noh ia ka jingthmu ban wanrah ia katei ka ktem ‘Khalai’ ha Ri Bhoi.

Ha ka dorkhas kaba u MLA Jirang u la phah sha u Myntri Rangbah, u la pynpaw ba ka nongrim kaba la pynlong ia u ba un shimkhia bad ban phah phah jingthoh, ka dei namar ba baroh kitei ki jaka ba ka sorkar ka la thmu ban buh ktem ‘Khalai’, ki dei kiba hap ha Jirang Constituency bad kiba hap hapoh ka Raid Marwet ha Ri Bhoi.

Katei ka jingthoh ka la kdew ruh, ba la jan baroh ki paidbah ki pyrshah ia katei ka ktem ‘Khalai’, la ka long na ki paidbah kiba hap hapoh ka konstitwensi jong u, na Distrik bad jylla hi baroh kawei, ki pyrshah jur ia katei ka ktem ‘Khalai’ bad dei halor katei ka nongrim, kaba la pynlong ia utei u MLA Jirang ba un don ha ka liang ki paidbah bad ruh ban pyrshah beit ia katei ka ktem ‘Khalai’.

Ha kajuh ruh ka por u MLA Jirang, u la pynpaw ba katei ka jingthmu ka sorkar ban buh ia kitei ki ktem ‘Khalai’, ka la ktah shikatdei eh ia ka jingsngew ki paidbah ka thain bad ha ka Konstitwensi hi baroh kawei.
Kumta na ka liang utei u MLA, u la buh ka kyrpad ia u Myntri Rangbah ka sorkar jylla, ba u dei ban pynmih noh da ka jingthoh bad ka ban pynpaw shai ba ia katei ka ktem khalai yn pynduh pyndom noh, khnang ba kan pynsuk noh ia ka mynsiem ki paidbah, kiba la mih na ka por sha ka por ban pyrshah ia katei ka ktem ‘Khalai’.