Pulom ka jingthmu ka HITO, ban hiar sha ophis U Syiem Marwet; naba shah khang lynti ha ki bor Distrik

Nongpoh:Ka jingthmu jong ki nongialam bad ki dkhot ka Hynniewtrep Indigenous Territorial Organization (HITO), ban leit tur sha ophis u Syiem ka Raid Marwet kaba don ha Baridua, ka la pulom noh, kata hadien ba ki la shah khang lynti noh ha ki bor pyniaid Distrik ka Ri Bhoi ha Byrnihat.

Haba kitei ki nongialam bad dkhot ka HITO, ki la shah khang lynti noh ha ki Pulit ha Byrnihat, ka la don ka thma ktien kaba jur bha ha katei ka por bad kaba la pynlong ia kitei ki HITO, ba kin shong hapdeng surok bad kaba la wanrah ia ka jingsahkut kali ha surokbah NH-6.

Hadien kata, ka la don ka jingiakren hapdeng ki nongialam jong ka HITO lem bad ki bor pyniaid Distrik ka Ri Bhoi, ha kaba ki la ailad ia kitei ki HITO ba kin shu leitphai na 14mer bad ban pynlong jingialang pat ha Byrnihat.
Lyngba katei ka jingialang, la ai jingkren da u Bah Donbok Dkhar, President ka HITO, uba la ther tyngeh ia kane ka sorkar MDA, kaba la lamkhmat da ka NPP bad ki kyrteng kiba la shah ther eh ha katei ka sngi, ka dei ka kyrteng jong u Conrad K. Sangma bad u Bah Prestone Tynsong.