Haei ka don ka jingkhaii beain ia u dewiong, kylli u SMR

Shillong:U Symbud Myntri rangbah ka jylla u bah Prestone Tynsong, u la pyn skhem ba ki trok kit dewiong kiba iaid mynta ha surok ki dei kiba biang ia ka shalan kaba la ioh ka tnad bad kim dei ki trok kiba iaid beain, kumba la kynnoh.

Ha ba ia kren bad ki lad pathai khubor, na ka liang u bah Tynsong u la buh ka jingkylli “Haei ka don kata ka ka jing khaii beain ia u dew iong? Ki trok kit dew iong ki ba kit ia u dewiong u ba la dep ban leh auction da ka Coal India”.
“Ka coal India ka la dep ban auction, ym duna ia ka 1 lak MT u dewiong bad ki dei ki briew kiba la ioh ia ka shallan ki ba khaii dewiong ki pyn iaid ia ki trok dewiong mynta” u la bynrap.

U bah Tynsong u la ong “Ki truck kiba khaii dewiong mynta ki dei kiba iaid kat kum ka ain, ym kiba iaid beain namar ki dei ki ba don ka shallan bad ia kane la pyniaid da ka Coal India, lyngba ka Auction.
U la pynshai ruh “Ngi don 32 lak MT u dewiong uba la ioh jingbit ban die bad na kane 1 lak MT la iaid ka jingdie bad ka shalan la dep pyllait”.
U la bynrap ruh “Ki lad pathai khubor kim dei ban shu sngap ia ki jingkynthoh na kino kino ki briew, hynrei ki dei ban kynduh ia u DMR, ki ophisar ka tnad Khlaw, ki ophisar ka tnad Director Mineral Resources ba katno tylli ki shallan la pyllait”.

“Tang ba don ki nongkynthoh ba kine ki dei kiba beain kam dei ban bud, hynrei dei ban wad bha na ka tnad Directorate of Mining and Geology ba katno tylli ki shalan la pyllait haduh mynta ba phin shai”u la ong.
Halor ka jingkynnoh ba ka tnad pulit kam treh ban register ia ka ejahar ia ki truck ba ioh kem u la ong “Ka dei ka kamram jong ki pulit ban register ia ki jingujor ejahar bad ki dei ban peit la ka ejahar kan dei na ka bynta ki truck kiba don kot don sla ne ki bym don ki kot ki sla”.

“Hynrei nga kren shai ba ka jingiaid ki truck dewiong mynta ka dei kiba kit ia u dewiong uba la auction uba long 50 MT lane 1 lak bad shen ngin sa sdang noh ia ka auction noh ha West jaintia Hills, West khasi Hills bad Garo hills”la iathuh u symbud myntri rangbah ka jylla.
Halor ka jingkynnoh ba don ki High level, u bah Tynsong u la ong “Wat kylli na nga ia kata, hynrei nga ong balei kim sei madan ia ki kyrteng jong kita ki High level bad kawei kaba ki ong kam dei ka ba shisha, ki dei ban wad ka jingshisha ba kine ki truck ki dei kiba don ne ym don ki kot ki sla”.