Ka sorkar India, ka dei ban tuklar dalade ia u pud u sam

Ha kaba kum kane ka jing sngew sohsat bad syier mynsiem jong u paidlang ka Ri Khasi Jaintia, halor ka jingduh noh ia ki jaka kiba bun bah ha ka Assam, ka wan mih ka sur, kaba sngewhun bad kaba sngew ioh mynsiem bad kata ka long, halor ka jingkren jong U MP ka Rajya Sabbha, U Dr WR Kharlukhi, ha kaba ula pynsngew ba ka sorkar India, ka dei ban tuklar dalade ia u pud u sam, lada ka Assam bad ka Megha laya, kim lah ban ia mynjur lang.

Katei ka jingkren jong U MP, ka la dei ban sait noh ia kito ki jingkren kobsob jong U Conrad Sangma, ha kaba u ong, ba ym lah shuh satia ban pyndam ia ka soskular jongu bad U Himanta Sarma lane ka MOU bad kumjuh, ba u pynksan, ba ki minister, ki la smat tasam, ha kaba ki leit jurip mawpud, wat ynda la shiteng miet; ynda haba ba ki la thiah lut ki nongshong shnong.

Haba kren ha ka jingialang jong ka Labang Nongphyllut, ha ki khyndiat sngi ba ladep, U MP, u pynkhreh ban pynkhih ia ka ishu, kaba la jia naduh u snem 1951, hapdeng ki hima Jaintia bad ka Mikir hills bad lada ia katei ka mat, kaba la don la 68 snem eiei, yn dang ia said bad ka sorkar India, kumta kan eh aiu ia kito lei kiba dang shu ia kajia, dang 50 snem ruh ym pat don bad kiba kane ka sorkar, kan ai sbun mynsiem, kumba 16 Kilometre eiei sha Assam, ha ka jing pynbeit pud ba nyngkong.

Ha kaba iadei bad katei ka mat, ka long kaba sngew ioh mynsiem shi katdei ba u MP, u ju kren beit ia kaei kaba don ha ka tyllong dohnud jongu bad ba um ju salia ban sangah iano iano ruh bad kam dei tang ha kane ka sien, hynrei ha ka jingiakren bad kawei ka kotkhubor, ha ki khyndiat bnai ba ladep, U MP, ula ther tyngeh, ia ka sorkar BJP, ba kam ju pyrkhat satia ia ki briew jong kane ka thain bad u ai nuksa ba wat tang ia U Vice Chancellor ha NEHU, ruh ka thung da u bar jylla bad u da ong shuh shuh, ba na katei ka daw, um ju leit shuh satia, sha ki jingialang jong ka NDA.
Ngi dei ban sngewthuh shai, ba ka kam pynbeit pud, kam dei satia ka kam jong ka Assam bad ka Meghalaya, hynrei, ka dei ka kam jong ka sorkar India lane ka Supreme Court bad ki trai jaka bad kam dei satia bad ki poiwir poihap.
Ha kaba kum kane ka khep, jong ka jing kyrduh nongialam, ha kaba ym don shuh kiba nud ban pyrshah ia U Himanta Sarma (lait tang ki khlieh nongsynshar bad ki seng bhalang) kumta, ka la dei ba ngin ia kitbok ia U MP, ba un pynurlong da ki kam, ia kaei kaba u la khlei.